వినాయక నిమజ్జనం ఏర్పాట్లపై అధికారులకు కలెక్టర్ ఆదేశం
మేడ్చల్ మల్కాజ్గిరి జిల్లా ప్రశ్న ఆయుధం ఆగస్టు 23
వినాయక చవితి నిమజ్జనం పూర్తయ్యే వరకు అధికారులు అప్రమత్తంగా ఉండాలని, భక్తులకు ఎలాంటి ఇబ్బందులు తలెత్తకుండా పకడ్బందీ ఏర్పాట్లు చేయాలని మేడ్చల్–మల్కాజిగిరి జిల్లా కలెక్టర్ మను చౌదరి ఆదేశించారు. శనివారం జిల్లా అదనపు కలెక్టర్ రాధిక గుప్తా, మేడ్చల్ డీసీపీ కోటిరెడ్డిలతో కలిసి శామీర్‌పేట చెరువులో నిమజ్జన ఏర్పాట్లను ఆమె పరిశీలించారు.
ఏర్పాట్లు ఇలా ఉండాలి:
* నిమజ్జన వేదికలు: చెరువు మధ్యలో నీటి మట్టం ఎక్కువగా ఉన్న చోట నిమజ్జన వేదికలు ఏర్పాటు చేయాలి.
* రహదారి పనులు: విగ్రహాల వాహనాలు సులభంగా వెళ్లేందుకు వీలుగా రహదారి పనులను వెంటనే పూర్తి చేయాలని ఆర్ అండ్ బి అధికారులను ఆదేశించారు.
* వెలుతురు: రాత్రి వేళల్లో నిమజ్జనం జరిగే అవకాశం ఉన్నందున, స్ట్రీట్‌లైట్లు, ఫ్లడ్‌లైట్లు ఏర్పాటు చేయాలి.
* మొబైల్ టాయిలెట్లు: భక్తుల సంఖ్య ఎక్కువగా ఉండే అవకాశం ఉన్నందున, తగిన సంఖ్యలో మొబైల్ టాయిలెట్లు అందుబాటులో ఉంచాలి.
* క్రేన్లు: గతంలో 3 క్రేన్లు ఏర్పాటు చేసిన చోట, ఈసారి 4 క్రేన్లు ఏర్పాటు చేయాలని సూచించారు.
* భద్రత: భక్తులు చెరువు దగ్గరకు వెళ్లకుండా బారికేడింగ్ చేయాలి. క్రేన్ ఆపరేషన్ చేసే డ్రైవర్, సిబ్బంది ఎల్లప్పుడూ అందుబాటులో ఉండాలి.
* వసతులు: తాగునీరు, వైద్య సదుపాయం, అంబులెన్స్ తప్పనిసరిగా ఏర్పాటు చేయాలి.
ఆర్ అండ్ బి, పోలీసు, విద్యుత్ శాఖలు సమన్వయంతో పనులు వేగవంతం చేయాలని కలెక్టర్ కోరారు. ఎలాంటి అవాంఛనీయ సంఘటనలు జరగకుండా ముందస్తు జాగ్రత్తలు తీసుకోవాలని ఆదేశించారు. ఈ కార్యక్రమంలో తూంకుంట మున్సిపల్ కమిషనర్ జ్యోతి, ఇతర అధికారులు పాల్గొన్నారు.
