ధాన్యం కొనుగోళ్లలో రికార్డు పురోగతి: కలెక్టర్లతో మంత్రి ఉత్తమ్ కుమార్ రెడ్డి సమీక్ష

*ధాన్యం కొనుగోళ్లలో రికార్డు పురోగతి: కలెక్టర్లతో మంత్రి ఉత్తమ్ కుమార్ రెడ్డి సమీక్ష*

మేడ్చల్ మల్కాజ్గిరి జిల్లా కృష్ణ ఆయుధం మే 16

యాసంగి ధాన్యం కొనుగోళ్ల పురోగతిపై రాష్ట్ర మంత్రులు, కలెక్టర్లతో మంత్రి ఉత్తమ్ కుమార్ రెడ్డి వీడియో కాన్ఫరెన్స్ నిర్వహించారు. ఈ కాన్ఫరెన్స్‌లో మంత్రులు తుమ్మల నాగేశ్వరరావు, కోమటిరెడ్డి వెంకట్ రెడ్డి, పొన్నం ప్రభాకర్, ప్రభుత్వ ప్రధాన కార్యదర్శి రామకృష్ణా రావు, పౌర సరఫరాల శాఖా ప్రధాన కార్యదర్శి డి.ఎస్.చౌహన్ తదితరులు పాల్గొన్నారు.

ఈ సందర్భంగా మంత్రి ఉత్తమ్ కుమార్ రెడ్డి మాట్లాడుతూ, ఈ యాసంగిలో రికార్డు స్థాయిలో ధాన్యం దిగుబడి వచ్చిందని, 60.14 లక్షల ఎకరాల్లో వరి ధాన్యం సాగు చేయగా, 129.35 లక్షల మెట్రిక్ టన్నుల ధాన్యం దిగుబడి వస్తుందని అంచనా వేశామన్నారు. ప్రభుత్వ లక్ష్యం 70.13 లక్షల మెట్రిక్ టన్నుల ధాన్యం కొనుగోలు చేయడమని, ఇప్పటికే 50 లక్షల మెట్రిక్ టన్నుల ధాన్యం కొనుగోలు చేశామని ఆయన తెలిపారు.

2023 రబీ సీజన్‌లో మే 15 నాటికి 25 లక్షల మెట్రిక్ టన్నుల ధాన్యం కొనుగోలు చేస్తే, ఈ రబీ సీజన్‌లో అదే మే 15 నాటికి 50 లక్షల మెట్రిక్ టన్నుల ధాన్యం కొనుగోలు చేయడం ముందెన్నడూ లేని రికార్డు అని ఆయన అన్నారు. రైతుల సౌకర్యార్థం పెద్ద సంఖ్యలో ధాన్యం కొనుగోలు కేంద్రాలు ఏర్పాటు చేశామని ఆయన చెప్పారు. యాసంగి ధాన్యం కొనుగోలుకు 8,348 కొనుగోలు కేంద్రాలు ఏర్పాటు చేశామని, 2021-22 రబీ సీజన్‌తో పోలిస్తే ఈ రబీ సీజన్‌లో 1,739 కేంద్రాలు అధికంగా ఏర్పాటు చేశామని ఆయన వివరించారు. ధాన్యం దిగుబడి రికార్డు స్థాయిలో పెరగడంతో కొనుగోలు కేంద్రాల సంఖ్యను పెంచడం జరిగిందని ఆయన తెలిపారు.

ధాన్యం కొనుగోళ్లను ప్రభుత్వం అత్యంత ప్రతిష్టాత్మకంగా తీసుకుందని, తడిసిన ధాన్యాన్ని సైతం కొనుగోలు చేస్తామని మంత్రి ఉత్తమ్ కుమార్ రెడ్డి స్పష్టం చేశారు. రైతు సంక్షేమానికి ప్రభుత్వం కట్టుబడి ఉందని, రైతుల అభీష్టానికి అనుగుణంగా ధాన్యం కొనుగోళ్ల ప్రక్రియను కలెక్టర్లు క్షేత్ర స్థాయిలో పర్యటిస్తూ పర్యవేక్షించాలని ఆయన సూచించారు. రానున్న 10, 12 రోజులు కొనుగోళ్ల ప్రక్రియలో అధికారులు అప్రమత్తంగా ఉంటూ, క్షేత్ర స్థాయిలో లోపాలు గుర్తించి సత్వరమే పరిష్కరించాలని ఆయన ఆదేశించారు. ధాన్యం కొనుగోళ్ల ప్రక్రియపై జరుగుతున్న దుష్ప్రచారాన్ని తిప్పి కొట్టాలని, నిజానిజాలు ప్రజలకు బహిర్గతం చేసి రైతులకు భరోసా కల్పించడంలో కలెక్టర్లు చొరవ తీసుకోవాలని ఆయన కోరారు.

ఈ వీడియో కాన్ఫరెన్స్‌లో మేడ్చల్ మల్కాజిగిరి జిల్లా కలెక్టర్ గౌతం, ఇంఛార్జీ అదనపు కలెక్టర్ హరిప్రియ, జిల్లా సివిల్ సప్లై జిఎం సుగుణబాయి, జిల్లా వ్యవసాయాధికారి చంద్రకళ, జిల్లా పౌర సరఫరాల అధికారి తదితరులు పాల్గొన్నారు.