**ఉద్యోగుల సమస్యల పరిష్కారానికి మేడ్చల్ మల్కాజిగిరి జిల్లాలో కీలక సమావేశం**
మేడ్చల్ మల్కాజ్గిరి జిల్లా ప్రశ్న ఆయుధం ఏప్రిల్ 15
తెలంగాణ రాష్ట్ర ప్రభుత్వ ఉద్యోగుల పెండింగ్‌లో ఉన్న సమస్యల పరిష్కారానికి తెలంగాణ ఎంప్లాయిస్ జాయింట్ యాక్షన్ కమిటీ (టి.జి.ఈ.జె.ఎసి) ప్రకటించిన కార్యాచరణ పథకం మేరకు మేడ్చల్ మల్కాజిగిరి జిల్లాలో కీలక పరిణామం చోటుచేసుకుంది.
తెలంగాణ నాన్ గెజిటెడ్ అధికారుల సంఘం అధ్యక్షుడు బి. రవి ప్రకాశ్ మంగళవారం విడుదల చేసిన ప్రకటనలో, ఏప్రిల్ 16, 2025 (బుధవారం) మధ్యాహ్నం మేడ్చల్ మల్కాజిగిరి జిల్లాలోని ఇంటిగ్రేటెడ్ డిస్ట్రిక్ట్ ఆఫీసుల సముదాయంలో ఒక ముఖ్యమైన సమావేశం నిర్వహించనున్నట్లు తెలిపారు.
ఈ సమావేశంలో వివిధ ఉద్యోగ సంఘాల ప్రతినిధులతో తెలంగాణ జాయింట్ యాక్షన్ కమిటీ సమావేశం నిర్వహించనుంది. ఈ సమావేశానికి తెలంగాణ నాన్ గెజిటెడ్ అధికారుల సంఘం అధ్యక్షత వహించనుండగా, ఉద్యోగులు, ఉపాధ్యాయులు మరియు పింఛనుదారుల సంఘాల ముఖ్య నాయకులు పాల్గొననున్నారు.ఈ సందర్భంగా బి. రవి ప్రకాశ్ మాట్లాడుతూ, “సంవత్సరాలుగా పరిష్కారం కాని ఉద్యోగుల సమస్యలను ప్రభుత్వం దృష్టికి తీసుకెళ్లేందుకు టి.జి.ఈ.జె.ఎసి నిరంతరంగా కృషి చేస్తోంది. ఉద్యోగుల హక్కుల పరిరక్షణ కోసం ఈ పోరాటం న్యాయం సాధించేవరకు కొనసాగుతుంది,” అని స్పష్టం చేశారు.అలాగే రాబోయే మే 2025 నుంచి ప్రభుత్వంపై కార్యాచరణ ప్రారంభించే అంశంపై ఈ సమావేశంలో చర్చించనున్నట్లు తెలియజేశారు. ఉద్యోగుల సంక్షేమం దృష్ట్యా భవిష్యత్తులో చేపట్టాల్సిన కార్యాచరణ ప్రణాళికపై సమావేశంలో కీలక నిర్ణయాలు తీసుకోనున్నారు.
ఈ సమావేశం మేడ్చల్ మల్కాజిగిరి జిల్లాలోని ప్రభుత్వ ఉద్యోగుల సమస్యల పరిష్కార దిశగా ఒక మైలురాయిగా భావిస్తున్నారు.
