గాంధారి అభివృద్ధికి కొత్త ఊపిరి

గాంధారి అభివృద్ధికి కొత్త ఊపిరి

సర్పంచ్ రేణుక సంజీవ్ నేతృత్వంలో వేగంగా ముందుకు సాగుతున్న గ్రామాభివృద్ధి

గాంధారి, డిసెంబర్ 22:

గాంధారి మండల కేంద్రంలో గ్రామాభివృద్ధి కార్యక్రమాలు వేగం పుంజుకుంటున్నాయి. ఇటీవల బాధ్యతలు స్వీకరించిన సర్పంచ్ రేణుక సంజీవ్ గ్రామాన్ని అభివృద్ధి పథంలో నడిపేందుకు కార్యాచరణను ప్రారంభించారు. ప్రజల అవసరాలను ప్రాధాన్యంగా తీసుకుని సమస్యల పరిష్కారానికి కృషి చేస్తున్నట్లు గ్రామస్తులు పేర్కొంటున్నారు.

 

బాధ్యతలు స్వీకరించిన కొద్ది రోజుల్లోనే గ్రామంలో నెలకొన్న మౌలిక వసతుల లోపాలను గుర్తించి సంబంధిత అధికారులతో సమన్వయం పెంచుకున్న సర్పంచ్ రేణుక సంజీవ్, అభివృద్ధి పనులపై దృష్టి సారించారు. త్రాగునీరు, పారిశుద్ధ్యం, వీధి దీపాలు, సీసీ రోడ్లు వంటి అంశాలపై ప్రత్యేక ప్రణాళిక రూపొందిస్తున్నట్లు సమాచారం.

 

ఈ మేరకు గాంధారి గ్రామపంచాయతీ కార్యాలయంలో నిర్వహించిన సమావేశంలో ఎంపీడీవో రాజేశ్వర్, ఉపసర్పంచ్, వార్డు సభ్యులు, పంచాయతీ సిబ్బంది పాల్గొని అభివృద్ధి అంశాలపై చర్చించారు. గ్రామానికి అవసరమైన పనులను దశలవారీగా చేపట్టాలని నిర్ణయించారు. ప్రభుత్వ పథకాలు ప్రతి అర్హుడికి చేరేలా చర్యలు తీసుకోవాలని సర్పంచ్ సూచించారు.

 

గ్రామాభివృద్ధిలో ప్రజల భాగస్వామ్యం అత్యంత కీలకమని పేర్కొన్న రేణుక సంజీవ్, ప్రతి ఒక్కరు సహకరించాలని కోరారు. పారదర్శక పాలనతో పాటు ప్రజలకు అందుబాటులో ఉండే పరిపాలన అందించడమే లక్ష్యంగా ముందుకు సాగుతున్నామని తెలిపారు.

 

గ్రామాభివృద్ధికి స్పష్టమైన దిశను చూపుతూ, అధికార యంత్రాంగంతో సమన్వయంతో ముందుకెళ్తున్న సర్పంచ్ రేణుక సంజీవ్ నాయకత్వం పట్ల గ్రామ ప్రజలు ఆశాభావం వ్యక్తం చేస్తున్నారు.