ఆర్.బి.ఎస్.కే కార్యక్రమంపై అదనపు కలెక్టర్ రాధికా గుప్తా సమీక్ష: పిల్లల ఆరోగ్య పరిరక్షణకు పటిష్ట చర్యలు
మేడ్చల్ మల్కాజిగిరి జిల్లా ప్రశ్న ఆయుధం జూలై 24
మేడ్చల్ మల్కాజ్గిరి జిల్లా లోకల్ బాడీస్ అదనపు కలెక్టర్ శ్రీమతి రాధికా గుప్తా అధ్యక్షతన గురువారం రోజు ఇంటిగ్రేటెడ్ డిస్ట్రిక్ట్ ఆఫీసెస్ కాంప్లెక్స్ కాన్ఫరెన్స్ హాల్‌లో ఆర్.బి.ఎస్.కే (రాష్ట్రీయ బాల్ స్వస్థ్య కార్య‌క్ర‌మం) టీమ్‌లతో సమీక్ష సమావేశం జరిగింది. పిల్లల మరియు కిశోరుల ఆరోగ్య సమస్యలను ముందుగానే గుర్తించి తగిన చికిత్స కల్పించే విధానాన్ని బలోపేతం చేయాలని ఆమె సూచించారు. ఫీల్డ్ స్థాయిలో జరుగుతున్న కార్యక్రమాలపై వివరంగా అడిగి, ప్రతి చిన్నారి ఆరోగ్య పరిరక్షణకు అన్ని చర్యలు తీసుకోవాలని అధికారులను ఆదేశించారు.
ఈ సందర్భంగా జిల్లా వైద్య మరియు ఆరోగ్య అధికారి డా. సి. ఉమా గౌరి , జిల్లాలో పనిచేస్తున్న ఆర్.బి.ఎస్.కే టీమ్‌ల నిర్మాణం, విధులు మరియు రోజువారీ కార్యాచరణ గురించి అదనపు కలెక్టర్‌కు వివరంగా వివరించారు. అనంతరం, ఆంగన్‌వాడీ ఆరోగ్య స్క్రీనింగ్, కంటి పరీక్షలు మరియు వికాస ఆలస్యం గుర్తింపుపై సమీక్ష నిర్వహించారు. డి.ఈ.ఐ.సి (నిలోఫర్ ఆసుపత్రి) కు రిఫర్ అయిన కేసుల సంఖ్య, ప్రస్తుతం చికిత్స పొందుతున్న కేసులు, మరియు ఫాలోఅప్ ప్రక్రియపై అధికారులు సమాధానం ఇచ్చారు. క్షేత్ర స్థాయిలో చికిత్సా సేవలు మెరుగుపడేలా చర్యలు తీసుకోవాలని ఆమె స్పష్టం చేశారు.
ఈ సమీక్షలో కీసర మరియు మల్కాజిగిరి డివిజన్ డిప్యూటీ డీఎంహెచ్ఓలు డా. శోభా మరియు డా. సత్యవతి , జిల్లా టీకా అధికారి డా. వి. కౌశిక్ , ఆర్.బి.ఎస్.కే టీమ్ సభ్యులు, వైద్య అధికారులు, ఫార్మసిస్టులు మరియు ఏఎన్ఎం లు పాల్గొన్నారు. ఫీల్డ్ లో ఎదురవుతున్న ఆచరణాత్మక సమస్యలు, వారి అనుభవాలను పంచుకుంటూ, సమన్వయంతో ముందుకు సాగాలని అదనపు కలెక్టర్ పిలుపునిచ్చారు. జిల్లాలోని ప్రతి చిన్నారి మరియు కిశోరుడు ఆరోగ్యంగా ఉండేలా కృషి కొనసాగించాలని సూచించారు.