*బూడిద వివాదం: జేసీ ప్రభాకర్ రెడ్డి, ఆది నారాయణరెడ్డిలకు చంద్రబాబు నుంచి పిలుపు*
తాడిపత్రి మాజీ ఎమ్మెల్యే జేసీ ప్రభాకర్ రెడ్డి, జమ్మలమడుగు ఎమ్మెల్యే ఆదినారాయణ రెడ్డిలను అమరావతికి రావాలని సీఎంఓ నుంచి గురువారం నాడు పిలుపు వచ్చింది. కడప ఆర్ టీ పీపీ ఫ్లైయాష్ విషయంలో ఈ ఇద్దరి మధ్య వివాదం కొనసాగుతోంది. ఈ విషయమై సీఎంఓ, కడప జిల్లా అధికారులతో చంద్రబాబు నవంబర్ 27 న మాట్లాడారు. వివాదం గురించి ఆరా తీశారు. ప్రభుత్వానికి చెడ్డపేరు తీస్తే సహించేది లేదని చంద్రబాబు వార్నింగ్ ఇచ్చారు.
*అమరావతికి రావాలని జేసీ, ఆదినారాయణ రెడ్డికి పిలుపు*
కడప ఆర్ టీ పీపీ ఫ్లైయాష్ వివాదంలో జేసీ ప్రభాకర్ రెడ్డి, ఆదినారాయణరెడ్డిలను నవంబర్ 29న అమరావతికి రావాలని చంద్రబాబు ఆదేశించారు.ఫ్లైయాష్ తరలించే విషయంలో ఈ ఇద్దరి మధ్య వివాదం నెలకొంది. ఈ విషయమై చంద్రబాబు మాట్లాడనున్నారు. ఈ ఇద్దరు నేతల మధ్య వివాదం నేపథ్యంలో ఆర్ టీ పీపీ వద్ద భారీ బందోబస్తు ఏర్పాటు చేశారు.
*అసలు వివాదం ఏంటి?*
రాయలసీమ థర్మల్ పవర్ స్టేషన్ లో ప్రతి రోజూ దాదాపు 4 వేల టన్నుల ఫ్లైయాష్ ఉత్పత్తి అవుతోంది. వైఎస్ఆర్ సీపీ ప్రభుత్వం ఉన్న సమయంలో ఈ బూడిదను అనంతపురం, కడప జిల్లాలకు చెందిన వైఎస్ఆర్ సీపీ ఎమ్మెల్యేలు సిమెంట్ ఫ్యాక్టరీలకు సరఫరా చేసేవారని చెబుతారు. రాష్ట్రంలో చంద్రబాబు ప్రభుత్వం ఏర్పాటైన తర్వాత బూడిద తరలింపుపై ఈ రెండు జిల్లాలకు చెందిన కూటమి ప్రజా ప్రతినిధుల కన్ను పడింది. తాడిపత్రి మాజీ ఎమ్మెల్యే జేసీ ప్రభాకర్ రెడ్డి వర్గీయులు ఈ బూడిదను తీసుకెళ్తున్నారు.అయితే జమ్మలమడుగు ఎమ్మెల్యే ఆదినారాయణ రెడ్డి వర్గీయులు ఇందుకు అభ్యంతరం చెబుతున్నారు. జేసీ ప్రభాకర్ రెడ్డి వర్గీయులకు చెందిన లారీలు ఆర్టీపీపీ ప్లాంట్ కు వెళ్లినా బూడిద లోడ్ చేయకుండా అడ్డుకున్నారని ఆరోపణలున్నాయి. ఈ విషయమై జేసీ ప్రభాకర్ రెడ్డి కడప, అనంతపురం జిల్లాల ఎస్పీలకు లేఖలు రాశారు. ఈ విషయమై ఆదినారాయణరెడ్డి, జేసీ ప్రభాకర్ రెడ్డి వర్గీయుల మధ్య జరిగిన చర్చల్లో పురోగతి లేదు. దీంతో బూడిద తరలింపుపై రెండు వర్గాలు పట్టుదలగా ఉన్నాయి. దీంతో ఎలాంటి అవాంఛనీయ ఘటనలు జరగకుండా పోలీసులు బందోబస్తు ఏర్పాటు చేశారు.
