కామారెడ్డిలో కలెక్టర్ పర్యటించాలి – స్వాగతం చెప్పేందుకు సిద్ధంగా ఉన్న చెత్తకుప్పలు..?
పట్టణాన్ని మలచే పట్టుదల కలెక్టర్‌కు ఉందా..?
పట్టణంలో పర్యటించండి.. చెత్త గుట్టలు చూడండి – కలెక్టర్‌ను కోరుతున్న ప్రజలు
ఊరు బయట చెత్తపై స్పందించిన కలెక్టర్ పట్టణం లోపల ఎందుకు గమనించరు..?
పట్టణాన్ని నరకంగా మార్చిన మున్సిపల్ అధికారులపై చర్యలు తీసుకోండి
జనం మధ్య చెత్త.. డెంగ్యూ, మలేరియా, చికున్ గున్యా, జికా వైరస్‌కు ఆహ్వానం
హెచ్చరికలు కాదు.. జరిమానాలే చెత్త ఆపే మార్గం
ప్రశ్న ఆయుధం కామారెడ్డి, ఆగస్టు 7
కామారెడ్డి పట్టణ కేంద్రంలో ఎక్కడ చూసినా చెత్తే కనిపిస్తోంది. పక్కాగా ఉన్న నిబంధనలుంటేనా..? పట్టణ వాసులు కలెక్టర్‌ను ఒకసారి పట్టణంలోకి వస్తే సరి, కంటిచూపుతో చీల్చిచెదరగొట్టే అపరిశుభ్రతను ప్రత్యక్షంగా గమనిస్తారని కోరుతున్నారు.
జిల్లా కలెక్టర్ ఆశిష్ సాంగ్వాన్ మంగళవారం రాజంపేట మండలంలోని ఆర్గొండ గ్రామానికి వెళ్తున్న క్రమంలో చిన్న మల్లారెడ్డిలో రోడ్డు పక్కన చెత్త కనిపించి తానా వాహనం ఆపి అధికారులను ఆదేశాలను జారీ చేశారు. అయితే ఇదే కలెక్టర్ పట్టణంలో పడుతున్న చెత్త గురించి ఎందుకు స్పందించరు.? అనే విమర్శలు వినిపిస్తున్నాయి.
పట్టణంలో పేరుకుపోతున్న చెత్త – జామ్ అయిన డ్రైనేజీలు
ఎన్జీవోస్ కాలనీ, విద్యానగర్, కొత్తబస్తీ, దేవునిపల్లిలోనూ చెత్త దుమ్ము దులిపేస్తోంది. వీధికో చెత్తకుప్ప, పక్కన జామ్ అయిన డ్రైనేజీ. ప్లాస్టిక్ వ్యర్థాలు, చెత్త నీటిలో కలుస్తూ దుర్వాసన పుట్టిస్తున్నాయి. దోమలు పెరిగి మలేరియా, డెంగ్యూ, చికున్ గున్యా వంటి వ్యాధులు వణికిస్తున్నాయి.
పటిష్ట చర్యలు తీసుకోకుంటే జన ఆరోగ్యం ముప్పే!
డెంగ్యూ, మలేరియా, జికా వైరస్, జపనీస్ ఎన్‌సెఫలైటిస్, పసుపు జ్వరం లాంటి వ్యాధులు ఇదే చెత్త కారణంగా జనాలను వేధించవచ్చని వైద్యులు హెచ్చరిస్తున్నారు. అధికారుల నిర్లక్ష్యం వల్లే ఇదంతా జరుగుతుందని ప్రజలు మండిపడుతున్నారు. చెత్త వేయడాన్ని నియంత్రించాలంటే చట్టాలను కఠినంగా అమలు చేయాలి. హెచ్చరికలు కాకుండా జరిమానాలు వేస్తే తప్ప నయం కాదని అంటున్నారు.
“ఆదేశాలు కాదు.. చర్యలు కావాలి” – మల్లికార్జున్, ఎన్జీవోస్ కాలనీ వాసి
“చెత్త వేయడాన్ని అరికట్టాలంటే అధికారులు మెలకువ చూపాలి. ఇటీవలి కాలంలో అసలు పట్టించుకోవడం లేదు. అధికారులే చేతులు దులుపుకుంటే ప్రజలెవరూ బాధ్యత తీసుకోరని గుర్తించాలి.”
పట్టణాభివృద్ధికి ప్రతి అడుగు కీలకం. జిల్లా కలెక్టర్ ఇప్పటికైనా స్పందించి, పట్టణంలో పర్యటించి, చెత్త సమస్యపై ప్రత్యేక దృష్టి సారించాలని స్థానికులు డిమాండ్ చేస్తున్నారు.
“ఊరు బయట కనిపించిన చెత్తపై ఆదేశాలు ఇచ్చే కలెక్టర్.. పట్టణంలోని చెత్తపై ఎందుకు మౌనం?”
