సంగారెడ్డి జిల్లాలోని హత్నూర గ్రామ పంచాయతీ కార్యాలయంలో బాల్య వివాహ చట్టంపై న్యాయ అవగాహన సదస్సును జిల్లా న్యాయ సేవాధికార సంస్థ నిర్వహించింది. ఈ సదస్సులో బాల్య వివాహాల నివారణ, చట్టపరమైన రక్షణలపై వక్తలు వివరించారు.
జిల్లా న్యాయ సేవాధికార సంస్థ కార్యదర్శి బి. సౌజన్య ఆధ్వర్యంలో జరిగిన ఈ కార్యక్రమంలో, బాల్య వివాహాల నిర్మూలన ఆవశ్యకతను నొక్కి చెప్పారు. బాల్యవివాహ రహిత గ్రామంగా తీర్చిదిద్దాలని పిలుపునిచ్చారు.
పిల్లలపై జరిగే లైంగిక నేరాలకు పాక్సో యాక్ట్ ద్వారా కఠిన శిక్షలు, కుటుంబ హింసకు డొమెస్టిక్ వైలెన్స్ యాక్ట్ ద్వారా రక్షణ లభిస్తుందని బి. సౌజన్య వివరించారు. సైబర్ వేధింపులు, ఆన్లైన్ మోసాల పట్ల మహిళలు అప్రమత్తంగా ఉండాలని సూచించారు.
అన్యాయం జరిగినప్పుడు భయపడకుండా చట్టపరమైన సహాయం పొందాలని, వృద్ధుల సంరక్షణ పిల్లల బాధ్యత అని తెలిపారు. జిల్లా న్యాయ సేవా సంస్థ ద్వారా ఉచిత న్యాయ సహాయం అందుబాటులో ఉందని, న్యాయ సహాయం అవసరమైన వారు కార్యాలయాన్ని సంప్రదించాలని సూచించారు.
ఈ కార్యక్రమంలో హత్నూర ఎస్ఐ శ్రీధర్ రెడ్డి, గ్రామ సర్పంచ్ ఎల్లయ్య, పంచాయతీ కార్యదర్శి, గ్రామస్తులు పాల్గొన్నారు. పిల్లల సంరక్షణ, వారి బాగోగులు చూడటం, చట్టాలపై అవగాహన కలిగి ఉండటం వంటి అంశాలపై చర్చించారు.
