కీసరలో 'అలైవ్–అరైవ్' కార్యక్రమం: యువతకు ఏసీపీ చక్రపాణి దిశానిర్దేశం

కీసరలోని అంబేద్కర్ చౌక్ వద్ద స్ఫూర్తి డిగ్రీ మరియు ఇంటర్ కళాశాల విద్యార్థుల ఆధ్వర్యంలో 'అలైవ్–అరైవ్' కార్యక్రమం ఉత్సాహంగా జరిగింది. ఈ సందర్భంగా విద్యార్థులు సమాజంలో ఐక్యత, శాంతి, సోదరభావం పెంపొందించుకోవాలని ప్రతిజ్ఞ చేశారు. ఒకరినొకరు ఆలింగనం చేసుకుంటూ స్నేహపూర్వక వాతావరణాన్ని సృష్టించారు.

కార్యక్రమానికి ముఖ్య అతిథిగా హాజరైన ఏసీపీ ఎస్. చక్రపాణి, దేశాభివృద్ధిలో యువత పాత్ర కీలకమని, పరస్పర గౌరవం, సహనం పాటించడం అవసరమని పేర్కొన్నారు. యువత వ్యసనాలకు దూరంగా ఉండాలని, మద్యం సేవించి వాహనాలు నడపడం చట్టరీత్యా నేరమని ఆయన హెచ్చరించారు.

ట్రాఫిక్ నిబంధనలను కచ్చితంగా పాటించడం ద్వారా ప్రమాదాలను నివారించవచ్చని, తద్వారా కుటుంబాలు నష్టపోకుండా ఉంటాయని ఏసీపీ వివరించారు. ప్రతి ఒక్కరూ తమ బాధ్యతను గుర్తించి వ్యవహరించాలని ఆయన సూచించారు.

ఈ కార్యక్రమంలో సీఐ ఆంజనేయులు, ఎస్‌ఐ హరిప్రసాద్, స్ఫూర్తి కళాశాల అధ్యాపకులు, విద్యార్థులు పాల్గొన్నారు. చట్టవిరుద్ధ కార్యకలాపాలకు దూరంగా ఉంటూ, ట్రాఫిక్ నియమాలను పాటించడం ద్వారా తమ భవిష్యత్తును సురక్షితం చేసుకోవాలని పోలీసులు విద్యార్థులకు సూచించారు.