తెలంగాణ ఆవిర్భావం తర్వాత తొలిసారి అధికారంలోకి వచ్చిన కాంగ్రెస్.. తనదైన మార్క్ పాలనతో ముందుకెళ్తోంది.సీఎం రేవంత్ రెడ్డి పాలనను పటిష్ఠం చేయటంతో పాటు పార్టీని కూడా బలోపేతం చేసే దిశగా అడుగులు వేస్తున్నారు. అసెంబ్లీ ఎన్నికల సమయంలో పార్టీ టికెట్లు ఆశించి భంగపడిన పలువురు కీలక నేతలకు నామినేటెడ్ పోస్టులు కేటాయించారు.ఇటీవల దాదాపు 35 మందికి పైగా కీలక నేతలకు పదవులు కట్టబెట్టారు. మరికొందరు నేతలకు కూడా పార్టీ పదవులు కట్టబెట్టే యోచనలో సీఎం రేవంత్ ఉన్నట్లు సమాచారం.అందులో భాగంగా గద్వాల మాజీ జెడ్పీ ఛైర్మన్, కాంగ్రెస్ నాయకురాలు సరితా తిరుపతయ్యకు కీలక పదవి కట్టబెట్టనున్నట్లు సమాచారం. ఆమెను రాష్ట్ర కాంగ్రెస్ మహిళా విభాగం అధ్యక్షురాలిగా నియమిస్తారనే టాక్ వినిపిస్తోంది.
నిజానికి ఆమె బీఆర్ఎస్ పార్టీ ద్వారా రాజకీయ ప్రస్థానాన్ని ప్రారంభించింది. ఆ పార్టీ టికెట్‌పై జడ్పీటీసీగా విజయం సాధించి గత పర్యాయం జెడ్పీ ఛైర్మన్‌గా పనిచేసింది.
అయితే అసెంబ్లీ ఎన్నికలకు ముందు అనుహ్యంగా బీఆర్ఎస్ పార్టీని వీడి కాంగ్రెస్ పార్టీలో చేరారు. గద్వాల కాంగ్రెస్ అభ్యర్థిగా బరిలోకి దిగి ఓటమి పాలయ్యారు. అక్కడ బీఆర్ఎస్ అభ్యర్థి బండ్ల కృష్ణ మోహన్ రెడ్డి ఎమ్మెల్యేగా విజయం సాధించారు. ఆ తర్వాత చోటు చేసుకున్న రాజకీయ పరిణామాల్లో బండ్ల కాంగ్రెస్ తీర్థం పుచ్చుకున్నాడు. ఈ వ్యవహారంతో సరిత తీవ్ర ఆవేదనకు గురయ్యారు.
తన రాజకీయ ప్రత్యర్థిని పార్టీలోకి ఆహ్వానించటంపై ఆమె కలత చెందారు. బండ్ల చేరికను వ్యతిరేకిస్తూ.. కాంగ్రెస్ సీనియర్ నేత, ఎంపీ మల్లు రవిని కలిసి తన గోడును వెల్లబోసుకున్నారు. బండ్ల కాంగ్రెస్ పార్టీలోకి వస్తే తన రాజకీయ భవిష్యత్తు ఏంటని ఆమె ప్రశ్నించారు. ఈ నేపథ్యంలో ఆమెను బుజ్జగించే పనిలో కాంగ్రెస్ నిమగ్నమైనట్లు తెలిసింది. అందులో భాగంగా ఆమెకు సముచిత స్థానం కల్పించేందుకు నిర్ణయం తీసుకున్నట్లు సమాచారం.
సరిత బీసీ మహిళ కావటంతో ఆమెను కాంగ్రెస్ మహిళా విభాగం అధ్యక్షురాలిగా నియమిస్తే రెండు రకాలుగా వర్కౌట్ అవుతుందని సీఎం రేవంత్ భావిస్తున్నారట. సరితకు గౌరవం ఇవ్వటంతో పాటు బీసీలకు న్యాయం చేసినట్లు అవుతుందని.. ఆమెకు ఈ పదవి కట్టబెట్టనున్నట్లు సమాచారం. దీనిపై త్వరోలోనే అధికారిక ప్రకటన వెలువడనున్నట్లు పొలిటికల్ సర్కిల్‌లో జోరుగా చర్చ జరగుతోంది.