రాజన్న సిరిసిల్ల జిల్లాలో, ఇన్స్టాగ్రామ్ పరిచయం ద్వారా ఏర్పడిన ప్రేమ వ్యవహారంలో ఒక యువతి తన తల్లి బంగారాన్ని దొంగిలించి, ఆ సొమ్ముతో ప్రియుడికి ఖరీదైన బైక్ కొనిచ్చిన ఘటన వెలుగులోకి వచ్చింది. ఈ సంఘటన స్థానికంగా కలకలం రేపుతోంది.
గంభీరావుపేట మండలానికి చెందిన ఓ యువతికి, ఇన్స్టాగ్రామ్ ద్వారా ఎల్లారెడ్డిపేట మండలం రాచర్ల గొల్లపల్లి గ్రామానికి చెందిన యువకుడితో పరిచయం ఏర్పడింది. వీరి పరిచయం క్రమంగా ప్రేమగా మారింది. ఇద్దరూ తరచుగా మాట్లాడుకునేవారు.
ఈ క్రమంలో, యువకుడు తనకు ఖరీదైన బైక్ కొనివ్వాలని యువతిని కోరినట్లు సమాచారం. ప్రియుడి కోరిక తీర్చాలనే ఉద్దేశంతో, డబ్బులు లేకపోవడంతో యువతి ఇంట్లో ఉన్న తన తల్లి బంగారాన్ని రహస్యంగా తీసుకుని విక్రయించింది. ఆ డబ్బులతోనే ప్రియుడికి బైక్ కొనిచ్చినట్లు తెలుస్తోంది.
కొంతకాలం తర్వాత ఇంట్లో బంగారం కనిపించకపోవడంతో తల్లికి అనుమానం వచ్చి, వెతికినా దొరకలేదు. అనంతరం, ఈ విషయం తెలుసుకున్న ఆమె ఎల్లారెడ్డిపేట పోలీస్ స్టేషన్లో ఫిర్యాదు చేశారు.
పోలీసులు ఈ ఘటనపై కేసు నమోదు చేసి దర్యాప్తు చేపట్టారు. సోషల్ మీడియా పరిచయాల విషయంలో యువతులు అప్రమత్తంగా ఉండాలని, ఇలాంటి మోసాలకు గురికాకుండా జాగ్రత్త వహించాలని పోలీసులు సూచిస్తున్నారు.
