నాగారం డివిజన్లో శ్రీరామనవమి సందర్భంగా సీతారాముల కళ్యాణ మహోత్సవం అత్యంత వైభవంగా జరిగింది. ఈ వేడుకల్లో కాంగ్రెస్ నాయకులు పాల్గొని ప్రత్యేక పూజలు నిర్వహించారు.
జిహెచ్ఎంసి వార్డ్–5, నాగారం డివిజన్ పరిధిలోని పలు కాలనీలలో శ్రీరామనవమి పర్వదినాన్ని పురస్కరించుకొని సీతారాముల కళ్యాణ మహోత్సవం అత్యంత వైభవంగా నిర్వహించారు. ఈ ఆధ్యాత్మిక కార్యక్రమాల్లో నాగారం మున్సిపల్ కాంగ్రెస్ పార్టీ నాయకులు భక్తిశ్రద్ధలతో పాల్గొని ప్రత్యేక పూజలు నిర్వహించారు.
నాగారం డివిజన్ కాంగ్రెస్ పార్టీ అధ్యక్షుడు ముప్పు శ్రీనివాస్ రెడ్డి ముఖ్య అతిథిగా హాజరయ్యారు. ఆయన కాలనీవాసుల ఆహ్వానం మేరకు వివిధ దేవాలయాల్లో జరిగిన కళ్యాణోత్సవాల్లో పాల్గొని స్వామివారికి పట్టువస్త్రాలు, తలంబ్రాలు సమర్పించారు.
ఈ సందర్భంగా ముప్పు శ్రీనివాస్ రెడ్డి మాట్లాడుతూ, లోక కళ్యాణార్థం నిర్వహించే సీతారాముల కళ్యాణాన్ని వీక్షించడం అదృష్టమని, నాగారం డివిజన్ ప్రజలందరూ సుఖసంతోషాలతో, ఆయురారోగ్యాలతో ఉండాలని దేవుని ప్రార్థించినట్లు తెలిపారు.
కాలనీ కమిటీల ఆధ్వర్యంలో భక్తులకు అన్నదాన కార్యక్రమాలు నిర్వహించగా, మున్సిపల్ కాంగ్రెస్ నాయకులు, కార్యకర్తలు, స్థానిక మహిళలు, వృద్ధులు అధిక సంఖ్యలో పాల్గొని కళ్యాణోత్సవాన్ని తిలకించారు.
