*బెస్ట్ అవైలబుల్ స్కూల్స్ బకాయిల విడుదల కోసం ధర్నా
నిజామాబాద్ అక్టోబర్ 13 (ప్రశ్న ఆయుధం)
రాష్ట్రవ్యాప్తంగా పెండింగ్‌లో ఉన్న **బెస్ట్ అవైలబుల్ స్కూల్స్ (BAS)**కు సంబంధించిన రూ.250 కోట్ల బకాయిలను వెంటనే విడుదల చేయాలని డిమాండ్ చేస్తూ, బోధన్ జేఏసీ ఆధ్వర్యంలో జిల్లా కలెక్టరేట్ ఎదుట ధర్నా నిర్వహించారు.
ఈ సందర్భంగా జేఏసీ జిల్లా నాయకులు నవాతే ప్రతాప్ మాట్లాడుతూ—”రాష్ట్రంలో 300 కి పైగా బెస్ట్ అవైలబుల్ స్కూల్స్ ఉన్నాయి. వీటికి సంబంధించి సుమారు రూ.250 కోట్లకు పైగా బకాయిలు ఇప్పటికీ పెండింగ్‌లో ఉన్నాయి. ఈ బకాయిలు విడుదల చేయకపోవడం వల్ల వెనుకబడిన తరగతులైన ఎస్‌సీ, ఎస్‌టీ విద్యార్థులు తీవ్రంగా నష్టపోతున్నారు. అలాంటి విద్యార్థులపై ప్రభుత్వం చిన్నచూపు చూపుతోంది. ఇది మానవీయంగా, సమాజపరంగా సరికాదు” అని ఆవేదన వ్యక్తం చేశారు.
అదే విధంగా, “తెలంగాణ ప్రత్యేక రాష్ట్రంగా ఏర్పడి, విద్యార్థులు ఉద్యమాల్లో కీలక పాత్ర పోషించారు. ఇప్పుడు అదే విద్యార్థులను నిర్లక్ష్యం చేయడం అన్యాయమని” ఆయన మండిపడ్డారు. ప్రభుత్వాన్ని వెంటనే స్పందించి బకాయిలను విడుదల చేయాలని, లేదంటే రాష్ట్రవ్యాప్తంగా ఆందోళన కార్యక్రమాలు ముమ్మరంగా జరుగుతాయన్న హెచ్చరిక చేశారు.
ఈ కార్యక్రమంలో జేఏసీ నాయకులు దేవర్ల నాగరాజు, రాజన్న, ఆర్.గౌతమ్ కుమార్, సంజయ్, మోసిన్, బాలరాజ్, ప్రశాంత్, శ్రీకాంత్, మోహన్, కిరణ్, సతీష్, శేఖర్ తదితరులు పాల్గొన్నారు.
