ప్రజాసేవా వ్యవస్థను అవమానించిన అధికారి ప్రవర్తనపై ఆగ్రహం
● ప్రజలతో అసభ్యంగా ప్రవర్తించిన సబ్‌ రిజిస్ట్రార్‌పై ఆరోపణలు
● కార్యాలయ సమయపాలనపై ప్రశ్నించగానే మీడియాపై దురుసు తీరుగా వ్యవహారం
● “వీడియో తీయడానికి నీవెవ్వరు?” అంటూ మీడియా ప్రతినిధులను అవమానించిన ఘటన
● ప్రజాసేవా వ్యవస్థపై నమ్మకానికి దెబ్బ, స్థానికుల్లో తీవ్ర ఆవేదన
● అధికారిపై విచారణ జరిపి క్రమశిక్షణ చర్యలు తీసుకోవాలని డిమాండ్
ఎల్లారెడ్డి, అక్టోబర్‌ 24 (ప్రశ్న ఆయుధం):
ప్రజాసేవ కోసం ఉన్న అధికారి, ప్రజలతో దురుసుగా ప్రవర్తించడం ప్రజాస్వామ్య వ్యవస్థకు మచ్చ అని స్థానికులు మండిపడుతున్నారు. ఎల్లారెడ్డి సబ్‌ రిజిస్ట్రార్‌ కార్యాలయంలో శుక్రవారం చోటుచేసుకున్న ఘటన ప్రాంతమంతా చర్చనీయాంశమైంది. కార్యాలయ సమయపాలనలో అవ్యవస్థ ఉందన్న ఫిర్యాదుల నేపథ్యంలో మీడియా ప్రతినిధులు ప్రత్యక్షంగా విచారణకు వెళ్లగా, సబ్‌ రిజిస్ట్రార్‌ ఆగ్రహంతో తీరని అహంకారం ప్రదర్శించారు.
సాక్షుల ప్రకారం, సబ్‌ రిజిస్ట్రార్‌ మీడియా ప్రతినిధులను చూసి “ఏం చేస్తారో చేసుకోండి… నా ఆఫీసు నుండి బయటకు వెల్లు… వీడియో తీయడానికి నీవెవ్వరు? ఎవరికీ నేను సమాధానం ఇవ్వాల్సిన అవసరం లేదు!” అంటూ అరిచారని తెలిపారు. ఈ సందర్భంగా జర్నలిస్టులను కార్యాలయంలోకి రానీయకుండా తలుపులు మూయించారని కూడా సమాచారం.
ప్రజల పన్ను రూపంలో జీతాలు పొందే అధికారులే, వారిపట్ల నిర్లక్ష్యంగా వ్యవహరించడం అసహనంగా ఉందని స్థానికులు విమర్శిస్తున్నారు. “ప్రజాసేవ అనేది ఓ బాధ్యత. అది అధికారం కాదు. ప్రజల పట్ల గౌరవం చూపని అధికారులు ఆ పదవులకు తగరని” అని ఎల్లారెడ్డి పౌరసమాజ ప్రతినిధులు ఆగ్రహం వ్యక్తం చేశారు.
ఈ ఘటనపై ఉన్నతాధికారులు తక్షణమే స్పందించి సబ్‌ రిజిస్ట్రార్‌ ప్రవర్తనపై సమగ్ర విచారణ జరిపి క్రమశిక్షణ చర్యలు తీసుకోవాలని ప్రజలు డిమాండ్ చేస్తున్నారు.
స్థానిక ప్రజలు, పాత్రికేయ వర్గాలు కలసి “ప్రజా విశ్వాసం కాపాడాలంటే ఇలాంటి అహంకార అధికారులను తక్షణమే నియంత్రించాలి” అని స్పష్టం చేశారు.
