కానిస్టేబుల్ విజేందర్ మృతదేహానికి నివాళులు అర్పించి జిల్లా ఎస్పీ సుధీర్ రాంనాధ్ కేకన్ ..
మహబూబాబాద్ జిల్లాలోని తొర్రుర్ పోలీస్ స్టేషన్‌లో విధులు నిర్వహిస్తున్న కానిస్టేబుల్ విజేందర్, అర్ధరాత్రి జరిగిన రోడ్డు ప్రమాదంలో తీవ్రంగా గాయపడి మరణించాడు. ఈ విషాద సంఘటన పోలీస్ శాఖను కలచివేసింది. విజేందర్ మరణ వార్త తెలుసుకున్న జిల్లా ఎస్పీ సుధీర్ రాంనాధ్ కేకన్ IPS, అతని పార్థివదేహానికి అంజలి ఘటించేందుకు స్వయంగా హాజరయ్యారు. ఎస్పీ సుధీర్ రాంనాధ్ గారు, మృతుడి స్వగ్రామం వరంగల్ జిల్లా చింతనెక్కొండకు చేరుకుని, విజేందర్ పార్థివదేహానికి పూలమాల వేసి ఘన నివాళి అర్పించారు. విజేందర్ అకాల మరణం పోలీస్ విభాగం కుటుంబ సభ్యులకు తీరని నష్టం అని ఎస్పీ అన్నారు. ఆయన ధైర్యంగా విధులు నిర్వహించి, ప్రజలకు సేవలందిస్తూ బాధ్యతాయుతంగా పనిచేసిన ఆ కానిస్టేబుల్ స్ఫూర్తి అందరికీ ఆదర్శంగా నిలుస్తుందని అన్నారు. మహబూబాబాద్ జిల్లాలోని పోలీస్ సిబ్బందితో పాటు, వివిధ శాఖల అధికారులు కూడా ఈ కార్యక్రమంలో పాల్గొని విజేందర్‌కు చివరి చూపు ఇచ్చారు.
