కామారెడ్డి ప్రభుత్వ కళాశాల భూములపై ఎమ్మెల్యేకు NSUI బహిరంగ లేఖ

కామారెడ్డి జిల్లా NSUI అధ్యక్షుడు ఐరేని సందీప్ కుమార్, స్థానిక ఎమ్మెల్యే వెంకట రమణారెడ్డికి ప్రభుత్వ డిగ్రీ కళాశాల భూముల వ్యవహారంపై ఒక బహిరంగ లేఖ రాశారు. గత కొంతకాలంగా ఈ భూముల అన్యాక్రాంతంపై ఇరువురి మధ్య వాదోపవాదాలు జరుగుతున్నాయని ఆయన లేఖలో పేర్కొన్నారు. ఫిబ్రవరి 23, 2026న, ఎమ్మెల్యే తన వద్ద ఉన్న ఆధారాలతో వస్తే తన ఎమ్మెల్యే పదవికి రాజీనామా చేస్తానని సవాల్ విసిరినట్లు సందీప్ కుమార్ తెలిపారు. అయితే, తన వద్ద ఉన్న ఆధారాలను పరిశీలించకుండానే ఎమ్మెల్యే కలెక్టరేట్ కార్యాలయంలో ప్రభుత్వ డిగ్రీ కళాశాల భూములకు సంబంధించిన RTI దరఖాస్తును సమర్పించి వెళ్లారని ఆయన ఆరోపించారు.

తాను పరిశీలించిన సమాచారం ప్రకారం, అరోరా ఇంజనీరింగ్ కళాశాల వ్యవహారంలో విస్తుపోయే నిజాలు బయటపడ్డాయని సందీప్ కుమార్ పేర్కొన్నారు. కామారెడ్డి పట్టణంలోని డిగ్రీ కళాశాల భూముల విషయంలో వెలుగులోకి వస్తున్న అంశాలు ప్రజల్లో తీవ్ర అనుమానాలను రేకెత్తిస్తున్నాయని, ఈ వ్యవహారంపై ఎమ్మెల్యే సమాధానం చెప్పాల్సిన బాధ్యత ఉందని ఆయన స్పష్టం చేశారు. కళాశాల కమిటీలో ఎమ్మెల్యే, ఆయన తండ్రి ప్రధాన కార్యదర్శిగా పనిచేయడం, అప్పటి భూదస్త్రాలు వారి వద్దనే ఉండటం బాధ్యతను మరింత పెంచుతుందని సందీప్ కుమార్ అభిప్రాయపడ్డారు.

ప్రభుత్వ డిగ్రీ కళాశాల పేరిట సేకరించిన భూములను వివిధ సంస్థలకు కేటాయించింది మీ కమిటీయేనని, అలాంటిది మళ్లీ RTI ద్వారా సమాచారం కోరడం హాస్యాస్పదమని ఆయన విమర్శించారు. ప్రధాన ఆరోపణల ప్రకారం, డిగ్రీ కళాశాలకు సంబంధించిన సుమారు 26 ఎకరాల భూమి విషయంలో లీజు, తనఖా వివరాలు పరస్పరం భిన్నంగా ఉన్నాయని సందీప్ కుమార్ తెలిపారు. కామారెడ్డి కాలేజ్ ఎడ్యుకేషన్ సొసైటీ అరోరా ఇంజనీరింగ్ కాలేజీకి ఇచ్చిన లీజు డీడ్‌లోని సర్వే నంబర్లు, విస్తీర్ణం, UCO బ్యాంకులో అరోరా ఇంజనీరింగ్ కాలేజీ తనఖా పెట్టిన సర్వే నంబర్లు, విస్తీర్ణం, అలాగే 2015 DCO విచారణ నివేదికలోని సర్వే నంబర్లు, విస్తీర్ణం పూర్తిగా వేరువేరుగా ఉన్నాయని ఆయన పేర్కొన్నారు.