కామారెడ్డి జిల్లాలో ప్రైవేటు పాఠశాలల్లో నిబంధనలకు విరుద్ధంగా పాఠ్యపుస్తకాలు విక్రయిస్తున్నారని, వాటి ధరలను నియంత్రించాలని కోరుతూ టిఎన్ఎస్ఎఫ్, టీజేఎస్ విద్యార్థి సంఘాలు జిల్లా విద్యాశాఖ అధికారికి వినతిపత్రం అందజేశాయి. అధిక ధరలకు పుస్తకాలు అమ్ముతూ విద్యార్థుల తల్లిదండ్రులను దోపిడీ చేస్తున్నారని ఆరోపించాయి.
టిఎన్ఎస్ఎఫ్ రాష్ట్ర ప్రధాన కార్యదర్శి డాక్టర్ బాలు, టీజేఎస్ కామారెడ్డి జిల్లా అధ్యక్షుడు కుంభాల లక్ష్మణ్ యాదవ్ లు మాట్లాడుతూ, ప్రైవేటు పాఠశాలలు విద్యార్థుల హక్కు చట్టాన్ని ఉల్లంఘించి, మార్కెట్ ధరల కంటే ఎక్కువ ధరలకు పాఠ్యపుస్తకాలను విక్రయిస్తున్నాయని ఆరోపించారు.
ఇది విద్యార్థుల తల్లిదండ్రులకు ఆర్థిక భారంగా మారుతోందని, తక్షణమే ఈ దోపిడీని అరికట్టాలని వారు డిమాండ్ చేశారు.
నిబంధనలకు విరుద్ధంగా వ్యవహరిస్తున్న పాఠశాలలపై కఠిన చర్యలు తీసుకోవాలని, వాటి గుర్తింపును రద్దు చేయాలని విద్యార్థి సంఘాలు కోరాయి. లేనిపక్షంలో ఆందోళన కార్యక్రమాలు నిర్వహిస్తామని హెచ్చరించాయి.
జిల్లా విద్యాశాఖ అధికారి మల్లికార్జున్ సమస్యను పరిశీలించి, తగు చర్యలు తీసుకుంటామని హామీ ఇచ్చినట్లు సమాచారం.
