తెలంగాణ రాష్ట్ర ప్రభుత్వం ప్రతిష్టాత్మకంగా చేపట్టిన గర్భాశయ క్యాన్సర్ నివారణ కార్యక్రమంలో భాగంగా పిట్లంలో హ్యూమన్ పాపిల్లోమావైరస్ (HPV) టీకా కార్యక్రమం ప్రారంభమైంది. ఈ కార్యక్రమం ద్వారా ఆడపిల్లలకు టీకాలు అందించి, వారి ఆరోగ్యాన్ని పరిరక్షించడం లక్ష్యంగా పెట్టుకున్నారు.
పిట్లంలోని ప్రభుత్వ ఆసుపత్రిలో జరిగిన ఈ కార్యక్రమంలో జుక్కల్ ఎమ్మెల్యే తోట లక్ష్మీకాంతరావు, కామారెడ్డి జిల్లా డీసీసీ అధ్యక్షులు ఏలే మల్లికార్జున్ పాల్గొని, ఆడపిల్లలకు HPV టీకాలు అందించారు. గర్భాశయ క్యాన్సర్ను నివారించడంలో ఈ టీకా కీలకమని ఎమ్మెల్యే తోట లక్ష్మీకాంతరావు పేర్కొన్నారు.
చిన్న వయస్సులోనే టీకాలు వేయించుకోవడం ద్వారా భవిష్యత్తులో క్యాన్సర్ బారిన పడే ప్రమాదాన్ని గణనీయంగా తగ్గించుకోవచ్చని ఆయన సూచించారు. ప్రజలు ఆరోగ్య విషయాల్లో అవగాహన పెంచుకోవాలని, ప్రభుత్వ ఆరోగ్య కార్యక్రమాలను సద్వినియోగం చేసుకోవాలని ఆయన కోరారు.
ఈ టీకా కార్యక్రమం ద్వారా అమ్మాయిల ఆరోగ్యాన్ని కాపాడటం, వారి భవిష్యత్తును సురక్షితంగా మార్చడం ప్రభుత్వ లక్ష్యమని అధికారులు తెలిపారు. ఈ కార్యక్రమంలో పిట్లం మండల స్థానిక నాయకులు, సర్పంచులు, ఆసుపత్రి సిబ్బంది పాల్గొన్నారు.
