అంతర్జాతీయ అబాకస్ పోటీలకు శ్రీ భాషిత పాఠశాల విద్యార్థి ఎంపిక

ఇటీవల హైదరాబాద్‌లో జరిగిన అబాకస్ జాతీయ స్థాయి పోటీలలో, వి. రిశ్విక్ తన గణిత నైపుణ్యాలను ప్రదర్శించి అంతర్జాతీయ స్థాయికి అర్హత సాధించాడు. చిన్న వయసులోనే వేగంగా, కచ్చితత్వంతో లెక్కలు చేయగల అతని సామర్థ్యం ప్రత్యేకంగా నిలిచింది.

పాఠశాల కరస్పాండెంట్ పోలపల్లి సుందర్ మాట్లాడుతూ, విద్యార్థుల సమగ్ర వికాసానికి పాఠశాల ప్రాధాన్యత ఇస్తుందని తెలిపారు. అబాకస్ వంటి అదనపు కార్యకలాపాలతో పాటు, క్రీడలు, సాంస్కృతిక కార్యక్రమాలను కూడా ప్రోత్సహిస్తున్నట్లు ఆయన పేర్కొన్నారు.

విద్యార్థులలో ఉన్న ప్రతిభను గుర్తించి, వారిని ప్రోత్సహించడమే తమ లక్ష్యమని సుందర్ అన్నారు. రిశ్విక్ అంతర్జాతీయ స్థాయికి ఎంపిక కావడం పాఠశాలకు గర్వకారణమని, భవిష్యత్తులో మరిన్ని విజయాలు సాధించాలని ఆకాంక్షించారు.

ఈ సందర్భంగా పాఠశాల కరస్పాండెంట్, ప్రిన్సిపల్స్, ఉపాధ్యాయులు, విద్యార్థులు రిశ్విక్‌ను అభినందించారు.