పుస్తకాలు మహోన్నతునిగా తీర్చిదిద్దుతాయి: గ్రంథాలయ చైర్మన్

పుస్తకాలు మనిషి జీవితాన్ని మార్చగల శక్తివంతమైన సాధనాలని, పఠనం ద్వారా జ్ఞానం పెరిగి సమాజంలో అవగాహన, చైతన్యం కలుగుతాయని జిల్లా గ్రంథాలయ సంస్థ చైర్మన్ పసుపులేటి వీరబాబు అన్నారు. పుస్తక దినోత్సవం సందర్భంగా భద్రాద్రి కొత్తగూడెం జిల్లా గ్రంథాలయ సంస్థ ఆధ్వర్యంలో ప్రత్యేక కార్యక్రమం నిర్వహించారు.

ముఖ్యంగా యువత రోజుకు కనీసం ఒక గంట అయినా పుస్తక పఠనానికి కేటాయించాలని ఆయన సూచించారు. డిజిటల్ యుగంలోనూ పుస్తకాల ప్రాధాన్యత ఏమాత్రం తగ్గలేదని, గ్రంథాలయాలు జ్ఞానానికి ఆలయాలుగా నిలుస్తున్నాయని తెలిపారు.

జిల్లాలోని గ్రంథాలయాలను మరింత అభివృద్ధి చేసేందుకు చర్యలు తీసుకుంటున్నామని, పాఠకులకు అన్ని రకాల సౌకర్యాలు కల్పించేందుకు కృషి చేస్తున్నామని వీరబాబు వెల్లడించారు. గ్రామీణ ప్రాంతాల్లోనూ పఠన సంస్కృతిని పెంపొందించేందుకు ప్రత్యేక కార్యక్రమాలు చేపడతామని చెప్పారు.

ఈ సందర్భంగా, గ్రంథాలయంలో చదివి ఎక్సైజ్ శాఖలో ఉద్యోగం సాధించిన పి. ఉపేందర్రావు గ్రంథాలయానికి రూ. 5000 విలువైన కూలర్ అందించారు. చైర్మన్ ఆయనకు కృతజ్ఞతలు తెలిపారు. ఈ కార్యక్రమంలో గ్రంథపాలకురాలు జి. మణి మృదుల, విద్యార్థులు, పాఠకులు పాల్గొన్నారు.