డిచ్పల్లి మండల పరిధిలోని జాతీయ రహదారి-44పై గురువారం మధ్యాహ్నం జరిగిన ఘోర రోడ్డు ప్రమాదంలో ఇద్దరు యువకులు మృతి చెందారు. ప్రమాద స్థలాన్ని పరిశీలించిన పోలీస్ కమిషనర్ పి. సాయి చైతన్య, భవిష్యత్తులో ఇలాంటి ఘటనలు పునరావృతం కాకుండా నివారణ చర్యలు చేపట్టాలని అధికారులను ఆదేశించారు.
పోలీసుల వివరాల ప్రకారం, రాయల్ ఎన్ఫీల్డ్ మోటార్ సైకిల్పై వెళ్తున్న ఇద్దరు యువకులు డిచ్పల్లి సమీపంలోని మలుపు వద్ద కారును తప్పించబోయి, వెనుక నుంచి వచ్చిన లారీ ఢీకొనడంతో అక్కడికక్కడే మృతి చెందారు. ప్రమాద సమాచారం అందుకున్న వెంటనే పోలీస్ కమిషనర్ పి. సాయి చైతన్య సంఘటనా స్థలానికి చేరుకుని పరిశీలించారు.
ప్రమాదానికి గల కారణాలను సమీక్షించిన అనంతరం, కమిషనర్ జాతీయ రహదారుల శాఖ, రవాణా శాఖ మరియు పోలీసు అధికారులతో సమావేశమయ్యారు. ప్రమాదాలు జరిగే ప్రాంతాలను గుర్తించి, హెచ్చరిక బోర్డులు, రిఫ్లెక్టర్లు, సైన్బోర్డులు, స్పీడ్ నియంత్రణ సూచికలు ఏర్పాటు చేయాలని సూచించారు.
రాత్రి వేళల్లో వాహనదారులకు స్పష్టంగా కనిపించేలా తగిన వెలుతురు సదుపాయాలు కల్పించాలని కూడా ఆదేశించారు. వాహనదారులు ట్రాఫిక్ నిబంధనలను తప్పనిసరిగా పాటించాలని, అతివేగం, నిర్లక్ష్యపు డ్రైవింగ్కు దూరంగా ఉండాలని కమిషనర్ ప్రజలకు విజ్ఞప్తి చేశారు.
ముఖ్యంగా ద్విచక్ర వాహనదారులు తప్పనిసరిగా హెల్మెట్ ధరించి, సురక్షిత ప్రయాణానికి అవసరమైన జాగ్రత్తలు తీసుకోవాలని ఆయన సూచించారు. ఈ కార్యక్రమంలో నిజామాబాద్ ఏసీపీ ప్రకాశ్, డిచ్పల్లి సీఐ వినోద్, ఎస్ఐ ఆరిఫ్ తదితరులు పాల్గొన్నారు.
