ఎల్లారెడ్డి పట్టణంలో మంగళవారం రాత్రి జరిగిన హిందూ సమ్మేళనం, హిందూ ఐక్యత, సంస్కృతి పరిరక్షణ ఆవశ్యకతను చాటింది. ఆధ్యాత్మిక, సాంస్కృతిక కార్యక్రమాలతో పాటు, సమాజంలో నైతిక విలువల ప్రాముఖ్యతను ఈ సందర్భంగా నొక్కి చెప్పారు.
పట్టణంలో జరిగిన ఈ సమ్మేళనానికి పలు ప్రాంతాల నుంచి హిందూ బంధువులు పెద్ద సంఖ్యలో హాజరయ్యారు. సత్యానంద ఆశ్రమం శ్రీశ్రీశ్రీ విశోక తీర్థ స్వామి మాట్లాడుతూ, హిందువులందరూ కులాలకు అతీతంగా ఐక్యంగా ఉండాలని, హైందవ సంస్కృతి, సనాతన ధర్మాన్ని పరిరక్షించుకోవాలని పిలుపునిచ్చారు. స్త్రీని గౌరవించడమే హైందవ సంస్కృతి గొప్పతనం అని ఆయన పేర్కొన్నారు.
ఆర్ఎస్ఎస్ ప్రచారక్ నర్రా వెంకటేశ్వర్ ప్రస్తుత సమాజంలో నైతిక విలువల క్షీణత, డ్యూయల్ ఇన్కమ్ – నో కిడ్స్ (DINK) వంటి ధోరణులు కుటుంబ వ్యవస్థపై చూపే ప్రభావం గురించి ఆందోళన వ్యక్తం చేశారు. తల్లిదండ్రులు పిల్లలకు చిన్నతనం నుంచే సంస్కారం, కుటుంబ విలువలు నేర్పాలని సూచించారు. హిందుత్వంలో కులవివక్షకు తావులేదని, అందరూ కలిసి ముందుకు సాగాలని ఆయన ఉద్బోధించారు.
కార్యక్రమంలో చిన్నారులు ప్రదర్శించిన సాంప్రదాయ, శాస్త్రీయ నృత్యాలు సభికులను ఎంతగానో ఆకట్టుకున్నాయి. భారతీయ సంస్కృతి, భక్తి, దేశభక్తిని ప్రతిబింబించిన ఈ ప్రదర్శనలు ప్రశంసలు అందుకున్నాయి.
ఈ సమ్మేళనం విజయవంతం కావడానికి సహకరించిన అందరికీ హిందూ సమ్మేళన కమిటీ, ఎల్లారెడ్డి తరఫున కృతజ్ఞతలు తెలిపారు. ధర్మ పరిరక్షణ కోసం ప్రతి హిందువు సిద్ధంగా ఉండాలని కోరారు.
