కామారెడ్డి జిల్లాలో ఎస్సీ/ఎస్టీ వర్గాలపై జరుగుతున్న అఘాయిత్యాల కేసులను వేగంగా విచారించి, బాధితులకు సత్వర న్యాయం అందించాలని జిల్లా కలెక్టర్ ఆశిష్ సాంగ్వాన్ అధికారులను ఆదేశించారు. సోమవారం జిల్లా స్థాయి విజిలెన్స్ & మానిటరింగ్ కమిటీ సమావేశంలో ఈ మేరకు సూచనలు జారీ చేశారు.
జిల్లా కలెక్టర్ ఆశిష్ సాంగ్వాన్ అధ్యక్షతన జరిగిన ఈ సమావేశంలో, పీసీఆర్ చట్టం, 1955 మరియు ఎస్సీ/ఎస్టీ (అత్యాచార నిరోధక) చట్టం, 1989 అమలుపై సమగ్రంగా చర్చించారు. జిల్లాలో నమోదైన కేసుల విచారణ పురోగతి, అఘాయిత్యాల నివారణ చర్యలు, బాధితులకు అందుతున్న సహాయం వంటి అంశాలపై సమీక్షించారు.
మార్చి 26, 2026 నాటికి ఎస్సీ/ఎస్టీ బాధితులకు ఎక్స్గ్రేషియా చెల్లింపుల పరిస్థితిని సమీక్షించారు. అయితే, మార్చి 17, 2026 నాటికి నమోదైన కొన్ని కేసులు ఇంకా పెండింగ్లో ఉన్నట్లు గుర్తించారు. ఈ కేసులను త్వరితగతిన పూర్తి చేయాలని కలెక్టర్ అధికారులకు స్పష్టం చేశారు.
ప్రత్యేక కోర్టుల్లో నమోదైన కేసుల స్థితిగతులపై కూడా సమీక్ష నిర్వహించారు. ఎస్సీ/ఎస్టీ వర్గాల భద్రత, సంక్షేమం కోసం సంబంధిత శాఖల అధికారులు సమన్వయంతో పనిచేయాలని, కేసుల పరిష్కారంలో జాప్యం జరగకుండా చూడాలని సూచించారు.
ఈ సమావేశంలో అదనపు ఎస్పీ బి. చైతన్య రెడ్డి, అదనపు కలెక్టర్ (రెవెన్యూ) వి.వి. విక్టర్, బాన్సువాడ, యెల్లారెడ్డి డీఎస్పీలు, జిల్లా షెడ్యూల్డ్ కులాల అధికారి పి. వెంకటేష్, కమిటీ సభ్యులు పాల్గొన్నారు. అందరూ సమన్వయంతో పనిచేసి బాధితులకు న్యాయం జరిగేలా చూడాలని కలెక్టర్ కోరారు.
