కొత్తగూడ మండలంలోని ప్రభుత్వ ప్రాథమిక ఆరోగ్య కేంద్రంలో (పీహెచ్సీ) వైద్యుల నిర్లక్ష్యం కారణంగా ఏజెన్సీ ప్రజలు సరైన వైద్యం అందక ఇబ్బందులు పడుతున్నారని ఆరోపణలు వెల్లువెత్తుతున్నాయి. నిర్ణీత సమయానికి వైద్యులు అందుబాటులో ఉండటం లేదని, సాయంత్రం ముందే విధులను ముగించి వెళ్లిపోతున్నారని స్థానికులు వాపోతున్నారు. అత్యవసర పరిస్థితుల్లో వైద్య సహాయం అందక బాధితులు తీవ్ర ఇబ్బందులు ఎదుర్కొంటున్నారు.
కొత్తగూడ మండల కేంద్రంలోని ప్రభుత్వ ఆసుపత్రికి డాక్టర్లు తమకు నచ్చినప్పుడే వస్తున్నారని, ఉదయం నిర్ణీత సమయానికి రాకపోవడం, సాయంత్రం 3 లేదా 4 గంటలకే విధులకు స్వస్తి చెప్పి వెళ్లిపోవడం పరిపాటిగా మారిందని స్థానికులు ఆరోపిస్తున్నారు. దీనివల్ల రాత్రి వేళల్లో అత్యవసర పరిస్థితుల్లో బాధితుల పరిస్థితి వర్ణనాతీతంగా మారుతోంది.
సరైన వైద్యం అందకపోవడంతో, చిన్న ప్రమాదం జరిగినా లేదా ప్రాణం మీదకు వచ్చినా కిలోమీటర్ల దూరంలో ఉన్న నర్సంపేటకు వెళ్లాల్సిన దుస్థితి నెలకొంది. తాజాగా జరిగిన బైక్ ప్రమాదంలో బాధితుడు శ్రీనుకు కొత్తగూడ ఆసుపత్రిలో డాక్టర్ లేకపోవడంతో పరిస్థితి విషమించి నర్సంపేటకు తరలించడమే దీనికి ప్రత్యక్ష నిదర్శనమని ప్రజలు తెలిపారు.
"మేము గిరిజనులం అని మా ప్రాణాలంటే లెక్కలేదా? పగలే సరిగ్గా ఉండని డాక్టర్లు, రాత్రి వేళల్లో అసలు కనబడటం లేదు. మా ప్రాణాలు పోయాక వస్తారా?" అని స్థానికులు ఆగ్రహం వ్యక్తం చేస్తున్నారు. తమకు సరైన వైద్య సేవలు అందించడంలో అధికారులు విఫలమవుతున్నారని వారు ఆరోపిస్తున్నారు.
ఈ సమస్యపై జిల్లా కలెక్టర్ మరియు వైద్య ఆరోగ్య శాఖ అధికారులు తక్షణమే స్పందించి, కొత్తగూడ పీహెచ్సీలో 24 గంటల వైద్య సేవలు అందుబాటులో ఉంచాలని, విధులకు గైర్హాజరయ్యే డాక్టర్లపై కఠిన చర్యలు తీసుకోవాలని, ఏజెన్సీ ప్రజల ప్రాణాలకు భరోసా కల్పించాలని స్థానిక ప్రజలు మరియు ప్రజా సంఘాలు డిమాండ్ చేస్తున్నాయి.
