మధ్యప్రాచ్యంలో నెలకొన్న సైనిక ఉద్రిక్తతలు రోజురోజుకూ తీవ్రమవుతున్నాయి. ఇరాన్, ఇజ్రాయిల్, అమెరికా దళాల మధ్య కొనసాగుతున్న దాడులు, ప్రతి దాడుల నేపథ్యంలో ప్రాంతీయ భద్రతపై ఆందోళనలు వ్యక్తమవుతున్నాయి.
ఫిబ్రవరి 28న ప్రారంభమైన యుద్ధం తీవ్రరూపం దాల్చుతోంది. అమెరికా, ఇజ్రాయిల్ దళాలు ఇరాన్లోని సెంట్రల్ ఇస్ఫహాన్ రాష్ట్రంపై క్షిపణి దాడులు జరిపినట్లు వార్తలు వస్తున్నాయి. ఈ దాడులలో ఫ్యాక్టరీలు, సైనిక స్థావరాలు లక్ష్యంగా చేసుకున్నారు. దీనికి ప్రతిస్పందనగా, ఇరాన్ కూడా ఇజ్రాయిల్తో పాటు, ఇరాన్, కువైట్లలోని అమెరికా స్థావరాలపై దాడులు చేపట్టింది.
ఇజ్రాయిల్ తెలిపిన వివరాల ప్రకారం, గత 24 గంటల్లో ఇరాన్ జరిపిన దాడులలో 108 మంది గాయపడ్డారు. ఇరాన్ వైపు నుంచి వస్తున్న క్షిపణులను అడ్డుకోవడం ఇజ్రాయిల్ బలగాలకు సవాలుగా మారింది. యుద్ధం ప్రారంభమైనప్పటి నుంచి ఇరాన్ దాడులలో 3,000 మందికి పైగా గాయపడి ఆస్పత్రుల్లో చేరినట్లు ఇజ్రాయిల్ ఆరోగ్య మంత్రిత్వ శాఖ వెల్లడించింది.
సౌదీ అరేబియా, ఇరాన్ ప్రయోగించిన నాలుగు డ్రోన్లను రియాద్ మెట్రోపాలిటన్ ప్రాంతంలో అడ్డుకున్నట్లు ప్రకటించింది. గత నెల 28 నుంచి ఇరాన్, సౌదీలోని ఇంధన మౌలిక సదుపాయాలు, అమెరికా ఆస్తులు, సైనిక స్థావరాలు, పట్టణ ప్రాంతాలను లక్ష్యంగా చేసుకుని దాడులు చేస్తోంది. యూఏఈలోని అల్-ధఫ్రా వైమానిక స్థావరంపై, ఫుజైరా ఓడరేవు వద్ద కూడా దాడులు జరిగినట్లు నివేదికలున్నాయి.
ఇరాన్ అంతరిక్ష పరిశోధనా కేంద్రం, ఇరాన్లోని షరాజ్ వంటి ప్రాంతాలపై దాడులు జరిగాయని, లెబనాన్లోని సిడాన్లో జరిగిన దాడిలో ఒక వ్యక్తి మరణించారని సమాచారం. అమెరికా అధ్యక్షుడు డోనాల్డ్ ట్రంప్, ఇరాన్లోని ఖర్గ్ దీవిపై మరిన్ని దాడులు చేస్తామని హెచ్చరించారు. చర్చలకు ఇరాన్ సిద్ధంగా ఉన్నా, దాని షరతులు అంగీకారయోగ్యం కావని ఆయన తెలిపారు. హర్మూజ్ జలసంధిని అమెరికా, ఇజ్రాయిల్ నౌకలకు మాత్రమే మూసివేసినట్లు ఇరాన్ విదేశాంగ మంత్రి అబ్బాస్ అరాగ్చీ తెలిపారు.
