NEET UG 2026 పేపర్ లీక్ కేసులో దర్యాప్తు పురోగమిస్తున్న కొద్దీ, రాజస్థాన్కు చెందిన ఒక కుటుంబం గతంలోనూ వైద్య ప్రవేశ పరీక్షల పేపర్లను లీక్ చేసి ఉండవచ్చని పోలీసులు అనుమానిస్తున్నారు. ఈ కేసులో వ్యవస్థీకృత అక్రమ నెట్వర్క్ ప్రమేయం ఉన్నట్లు ఆధారాలు లభిస్తున్నాయి.
నీట్ యూజీ 2026 పేపర్ లీక్ కేసులో విచారణలో భాగంగా, రాజస్థాన్కు చెందిన బివాల్ కుటుంబంపై గతంలోనూ ఇలాంటి ఆరోపణలు ఉన్నట్లు పోలీసులు భావిస్తున్నారు. జైపూర్ జిల్లాకు చెందిన మంగీలాల్ బివాల్, దినేష్ బివాల్ సోదరులు గత కొన్ని సంవత్సరాలుగా వైద్య ప్రవేశ పరీక్షల ప్రశ్నపత్రాలను లీక్ చేసి విక్రయించినట్లు అనుమానాలు వ్యక్తమవుతున్నాయి.
పోలీసుల దర్యాప్తు ప్రకారం, ఈ సోదరులు రాజస్థాన్లోని సికార్ ప్రాంతంలోని కోచింగ్ సెంటర్లకు ప్రశ్నపత్రాలను చేరవేసినట్లు గుర్తించారు. ముందుగా తమ కుటుంబ సభ్యుల కోసం ప్రశ్నపత్రాలను సేకరించి, ఆపై వాటిని ఇతరులకు భారీ మొత్తాలకు విక్రయించినట్లు దర్యాప్తులో తేలింది. బివాల్ కుటుంబానికి చెందిన ఐదుగురు విద్యార్థులకు పరీక్షకు ముందే NEET 2025 ప్రశ్నాపత్రం అందినట్లు పోలీసులు గుర్తించారు.
మంగీలాల్ కుమారుడు వికాస్ బివాల్, ప్రస్తుతం సవాయి మాధోపూర్ మెడికల్ కాలేజీలో ఎంబీబీఎస్ చదువుతున్నాడు. అతడికి కూడా ఈ లీకేజీ వ్యవహారంలో ప్రమేయం ఉన్నట్లు ఆరోపణలు ఉన్నాయి. ప్రశ్నపత్రాల సేకరణ, పంపిణీ కోసం నిందితులు రూ.65 లక్షలు చెల్లించినట్లు దర్యాప్తు అధికారులు వెల్లడించారు. ఈ వ్యవహారం కోచింగ్ సెంటర్ల మాఫియా ఆధ్వర్యంలో, వ్యవస్థీకృతంగా నడుస్తున్న అక్రమ నెట్వర్క్లో భాగమని అధికారులు పేర్కొంటున్నారు.
NEET పేపర్ లీక్ వివాదం దేశవ్యాప్తంగా తీవ్ర ఆగ్రహాన్ని రేకెత్తించడంతో, కేంద్ర ప్రభుత్వం NEET UG పరీక్షను రద్దు చేసి, కొత్త తేదీలను ప్రకటించింది. సీబీఐ దర్యాప్తునకు ఆదేశించడంతో, అధికారులు ఇప్పటికే పలువురిని అరెస్టు చేశారు. కేంద్ర విద్యాశాఖ మంత్రి ధర్మేంద్ర ప్రధాన్ కూడా ప్రశ్నపత్రం లీక్ జరిగిన విషయాన్ని అంగీకరించి, వ్యవస్థలో లోపం జరిగిందని, దీనికి ప్రభుత్వం బాధ్యత వహిస్తుందని తెలిపారు.
