సంగారెడ్డి జిల్లాలో విధులు నిర్వర్తిస్తున్న ట్రాఫిక్ పోలీసుల భద్రత, ఆరోగ్యాన్ని మెరుగుపరిచేందుకు జిల్లా ఎస్పీ పరితోష్ పంకజ్ ఆధ్వర్యంలో ప్రత్యేక రక్షణ కిట్లను పంపిణీ చేశారు. ఎండలు, వర్షాల నుంచి రక్షణ కల్పించే ఈ కిట్లలో 9 రకాల అత్యవసర సామగ్రి ఉంది.
ప్రజల సురక్షిత ప్రయాణాన్ని నిర్ధారించడంలో ట్రాఫిక్ పోలీసుల పాత్ర కీలకమని, వారి శ్రేయస్సు కూడా తమ బాధ్యతేనని జిల్లా ఎస్పీ పరితోష్ పంకజ్ అన్నారు. విధి నిర్వహణలో ఎదురయ్యే ప్రతికూల వాతావరణ పరిస్థితుల నుంచి సిబ్బందిని కాపాడేందుకు ఈ కిట్లను అందజేస్తున్నట్లు ఆయన తెలిపారు.
రోడ్డు ప్రమాదాల నివారణ, ట్రాఫిక్ సజావుగా సాగేలా చూడటంలో ట్రాఫిక్ సిబ్బంది అంకితభావాన్ని ఎస్పీ ప్రశంసించారు. వారి సేవలను మరింత సమర్థవంతంగా అందించడానికి ఈ రక్షణ చర్యలు దోహదపడతాయని ఆయన అభిప్రాయపడ్డారు.
పంపిణీ చేసిన కిట్లలో క్యాప్, కూలింగ్ గ్లాసెస్, రిఫ్లెక్టివ్ జాకెట్లు, రెయిన్ కోటు, వాటర్ బాటిల్, లైటింగ్ బ్యాటన్, షోల్డర్ లైట్తో కూడిన బ్యాగ్ వంటివి ఉన్నాయి. ఈ సామగ్రి విధి నిర్వహణలో ట్రాఫిక్ సిబ్బందికి ఎంతో ఉపయోగకరంగా ఉంటుంది.
ఈ కార్యక్రమంలో అదనపు ఎస్పీ చైతన్యరెడ్డి, పలువురు ట్రాఫిక్ ఇన్స్పెక్టర్లు, ఎస్ఐలు, సిబ్బంది పాల్గొన్నారు.
