సీనియర్ జర్నలిస్ట్ వై. నాగరాజు ప్రథమ వర్ధంతి సందర్భంగా హైదరాబాద్లో ఆయన సేవలను స్మరించుకుంటూ సంస్మరణ సభ నిర్వహించారు. ఈ కార్యక్రమంలో టిపిసిసి ఉపాధ్యక్షులు బండి రమేష్, సీనియర్ కాంగ్రెస్ నాయకులు గాలి బాలాజీతో పాటు పలువురు ప్రముఖులు, జర్నలిస్టులు పాల్గొన్నారు.
హైదరాబాద్లో సీనియర్ జర్నలిస్ట్ వై. నాగరాజు ప్రథమ వర్ధంతి కార్యక్రమం జరిగింది. ఈ సందర్భంగా ఏర్పాటు చేసిన సభలో టిపిసిసి ఉపాధ్యక్షులు, కూకట్పల్లి కాంగ్రెస్ ఇంచార్జ్ బండి రమేష్ మాట్లాడుతూ, వై. నాగరాజు సమాజ హితం కోసం, సామాన్య ప్రజల సంక్షేమం కోసం తన కలం ద్వారా ఎనలేని సేవలందించారని కొనియాడారు. జర్నలిజం వృత్తిలో ఆయన చేసిన కృషి ఎంతో గొప్పదని, అన్యాయాలను ఎత్తిచూపడంలో ఆయన ఎప్పుడూ ముందుండేవారని తెలిపారు.
గాలి బాలాజీ మాట్లాడుతూ, వై. నాగరాజు జర్నలిస్టుగా సమాజానికి సేవలు అందిస్తూనే, నిరుపేదల అభివృద్ధికి కూడా ఎంతో కృషి చేశారని గుర్తుచేశారు. ఆయన ఆశయాలను 'నిలువుటద్దం' పత్రిక కుటుంబ సభ్యులు కొనసాగిస్తూ ముందుకు తీసుకెళ్లడం అభినందనీయమని అన్నారు.
సుమారు 25 సంవత్సరాల క్రితం 'నిలువుటద్దం' పత్రికను స్థాపించి, సమాజానికి సేవలు అందించిన ఘనత వై. నాగరాజుకే దక్కుతుందని బండి రమేష్ పేర్కొన్నారు. ఆయన ప్రశ్నించే గొంతుకగా అక్రమార్కుల్లో భయాన్ని కలిగించారని అన్నారు.
ఈ కార్యక్రమంలో వై. నాగరాజు సతీమణి వై. రమాదేవి, వై. మౌనిక, సీనియర్ జర్నలిస్టులు, కాంగ్రెస్ నాయకులు, కుటుంబ సభ్యులు, శ్రేయోభిలాషులు పాల్గొన్నారు.
