సమాజాన్ని శాస్త్రీయ దృక్పథంతో అర్థం చేసుకుని, ప్రజా సమస్యల పరిష్కారంలో చురుకైన పాత్ర పోషించాలని, అందుకు విద్యార్థులే మార్గదర్శకులు కావాలని పలువురు వక్తలు పిలుపునిచ్చారు. ప్రోగ్రెసివ్ డెమోక్రటిక్ స్టూడెంట్స్ యూనియన్ (పీడీఎస్యూ) ఆధ్వర్యంలో నిజామాబాద్ నగరంలో నిర్వహించిన రాజకీయ శిక్షణా తరగతుల్లో ఈ పిలుపునిచ్చారు.
పీడీఎస్యూ ఆధ్వర్యంలో నిజామాబాద్ నగరంలో జరిగిన ఈ శిక్షణా తరగతులకు జిల్లా కమిటీ అధ్యక్షుడు కర్క గణేష్ అధ్యక్షత వహించారు. సీపీఐ(ఎంఎల్) మాస్ లైన్ జిల్లా కార్యదర్శి వనమాల కృష్ణ మాట్లాడుతూ, విద్యార్థుల్లో సామాజిక అవగాహన, ఉద్యమ చైతన్యం పెంపొందాల్సిన అవసరాన్ని వివరించారు.
జన విజ్ఞాన వేదిక రాష్ట్ర ఉపాధ్యక్షుడు నర్రా రామారావు “జీవ పరిణామ సిద్ధాంతం”పై ప్రసంగిస్తూ, మూఢనమ్మకాల కంటే శాస్త్రీయ ఆలోచనకు ప్రాధాన్యం ఇవ్వాలని, సమాజాన్ని హేతుబద్ధంగా అర్థం చేసుకోవాలని విద్యార్థులకు సూచించారు. పౌర హక్కుల సంఘం రాష్ట్ర కోశాధికారి ఆల్గోట్ రవీందర్ “గతితార్కిక భౌతికవాదం”పై మాట్లాడుతూ, సమాజంలో మార్పులు విరుద్ధ శక్తుల మధ్య సంఘర్షణల ద్వారానే సంభవిస్తాయని, ప్రతి అంశాన్ని తార్కికంగా, శాస్త్రీయంగా విశ్లేషించే దృక్పథాన్ని అలవర్చుకోవాలని సూచించారు.
పీడీఎస్యూ రాష్ట్ర ప్రధాన కార్యదర్శి ఎస్. అనిల్ సంస్థ చరిత్రను వివరిస్తూ, విద్యార్థుల హక్కుల పరిరక్షణ, ప్రజాస్వామ్య విలువల కాపాడటం, విద్యా సమస్యల పరిష్కారం కోసం పీడీఎస్యూ నిర్వహించిన ఉద్యమాలను ప్రస్తావించారు. ఫీజుల పెంపు, విద్యా రంగ ప్రైవేటీకరణ, నిరుద్యోగం వంటి సమస్యలపై విద్యార్థి ఉద్యమాల అవసరాన్ని వివరించారు.
పీడీఎస్యూ రాష్ట్ర మాజీ ఉపాధ్యక్షుడు ఎం. సుధాకర్ విద్యార్థి సంఘాల నిర్మాణం, పని విధానాలపై మాట్లాడారు. విద్యార్థుల సమస్యలను గుర్తించి వారిని సంఘటితం చేయడం, హక్కుల సాధన కోసం ప్రజాస్వామ్యబద్ధంగా పోరాడటం విద్యార్థి సంఘాల ప్రధాన బాధ్యత అని తెలిపారు. ఈ శిక్షణా తరగతుల్లో పాల్గొన్న విద్యార్థులు సమాజాన్ని శాస్త్రీయ దృక్పథంతో అర్థం చేసుకుని ప్రజా సమస్యల పరిష్కారానికి ఉద్యమాల్లో చురుకుగా పాల్గొనాలని నాయకులు పిలుపునిచ్చారు.
