తెలంగాణ రాష్ట్రంలో పెండింగ్లో ఉన్న సుమారు 10,000 కోట్ల రూపాయల స్కాలర్షిప్లు మరియు ఫీజు రీయింబర్స్మెంట్ నిధులను వెంటనే విడుదల చేయాలని ప్రగతిశీల ప్రజాస్వామ్య విద్యార్థి సంఘం (పిడిఎస్యూ) డిమాండ్ చేసింది. ఈ డిమాండ్తో పాటు, ప్రభుత్వ డిగ్రీ కళాశాలల బంద్కు పిడిఎస్యూ పిలుపునిచ్చింది.
పిడిఎస్యూ జిల్లా నాయకుడు దేవరకొండ రాహుల్ మాట్లాడుతూ, కాంగ్రెస్ ప్రభుత్వం అధికారంలోకి వచ్చి 25 నెలలు గడిచిపోయినా, విద్యారంగానికి 15% నిధులు కేటాయిస్తామని, పెండింగ్లో ఉన్న స్కాలర్షిప్లు, ఫీజు రీయింబర్స్మెంట్ నిధులను రెగ్యులర్గా విడుదల చేస్తామని ఇచ్చిన హామీలను నెరవేర్చలేదని ఆరోపించారు.
రాష్ట్ర ప్రభుత్వం విద్యార్థులకు దాదాపు 10,000 కోట్ల రూపాయల ఫీజు రీయింబర్స్మెంట్, స్కాలర్షిప్ నిధులను బాకీ పడిందని రాహుల్ తెలిపారు. ఈ నిధుల విడుదలకు విద్యార్థులు, విద్యార్థి సంఘాలు, విద్యాసంస్థల యాజమాన్యాలు అనేక దశల్లో ఉద్యమాలు నిర్వహిస్తున్నాయని ఆయన పేర్కొన్నారు.
పిడిఎస్యూ గతంలో కూడా పలు రూపాల్లో నిరసనలు చేపట్టిందని, ఎన్ని పోరాటాలు చేసినా ప్రభుత్వం నుంచి స్పందన లేదని రాహుల్ ఎద్దేవా చేశారు. ప్రభుత్వం విద్యార్థుల పట్ల ఇలాగే నిర్లక్ష్యం వహిస్తే, ముఖ్యమంత్రిని రోడ్లపై తిరగనివ్వకుండా అడ్డుకుంటామని పిడిఎస్యూ హెచ్చరించింది.
ప్రభుత్వం వెంటనే బడ్జెట్లో విద్యారంగానికి, స్కాలర్షిప్లకు అధిక నిధులు కేటాయించాలని, బెస్ట్ అవైలబుల్ స్కూల్స్కు ఇవ్వాల్సిన 218 కోట్ల పెండింగ్ నిధులను విడుదల చేయాలని డిమాండ్ చేశారు. ఈ నిరసన కార్యక్రమంలో పిడిఎస్యూ నాయకులు పాల్గొన్నారు.
