ప్రజాపాలన ప్రగతి ప్రణాళికలో భాగంగా నిర్వహిస్తున్న విద్యా వారోత్సవాల్లో భాగంగా, కామారెడ్డి జిల్లా కలెక్టర్ ఆశిష్ సాంగ్వాన్ రాజంపేట మండలంలోని పాఠశాలలను సందర్శించి, ఉపాధ్యాయులు, తల్లిదండ్రులతో సమావేశమయ్యారు. పదవ తరగతిలో ఉత్తమ ప్రతిభ కనబరిచిన విద్యార్థులను సన్మానించారు.
గురువారం రాజంపేట మండలంలో జరిగిన ఈ కార్యక్రమంలో, కలెక్టర్ ఆశిష్ సాంగ్వాన్ జిల్లా పరిషత్ బాలుర పాఠశాలలో విద్యార్థులను ఉద్దేశించి మాట్లాడారు. పదవ తరగతిలో ఉత్తమ ఫలితాలు సాధించిన విద్యార్థులను ఆయన అభినందించి, ఉన్నత లక్ష్యాలను సాధించాలని ప్రోత్సహించారు.
ఈ సందర్భంగా, జిల్లా పరిషత్ బాలికల హైస్కూల్లో తరగతి గదుల నిర్మాణానికి, మరమ్మత్తులకు సంబంధించిన అంశాలపై అధికారులు కలెక్టర్కు వివరించారు. అవసరమైన అంచనాలను వెంటనే సిద్ధం చేయాలని AE PR కు కలెక్టర్ ఆదేశించారు. గ్రామ పంచాయతీ నిధుల నుండి సహకారం ఉంటుందని సర్పంచ్ హామీ ఇచ్చారు.
విద్యార్థుల భవిష్యత్తు రూపకల్పనలో ఉపాధ్యాయులు, తల్లిదండ్రుల పాత్ర అనివార్యమని కలెక్టర్ పేర్కొన్నారు. నాణ్యమైన విద్యను అందించడానికి ప్రభుత్వం కట్టుబడి ఉందని, విద్యా వారోత్సవాల ద్వారా విద్యార్థుల్లో ఆసక్తిని పెంచడంతో పాటు పాఠశాలల్లో మౌలిక సదుపాయాలను మెరుగుపరచడమే లక్ష్యమని ఆయన తెలిపారు.
ఈ సమావేశంలో జిల్లా విద్యాధికారి రాజు, MRO, HM ఈశ్వర్, సర్పంచ్ శ్రీకాంత్, అధికారులు, ఉపాధ్యాయులు, తల్లిదండ్రులు పాల్గొన్నారు.
