నిజామాబాద్, జూలై 26
నిజామాబాద్ జిల్లా భీమ్గల్ మండల కేంద్రంలో నూతనంగా ఏర్పాటు చేసిన జూనియర్ సివిల్ జడ్జి-కమ్-జ్యుడీషియల్ మేజిస్ట్రేట్ ఫస్ట్ క్లాస్ కోర్టును ఆదివారం తెలంగాణ హైకోర్టు న్యాయమూర్తి జస్టిస్ తంగిరాల మాధవీదేవి ప్రారంభించారు. ఈ కోర్టు ఏర్పాటుతో గ్రామీణ ప్రజలకు సత్వర, సులభ న్యాయసేవలు అందుబాటులోకి వస్తాయని ఆమె తెలిపారు.
జిల్లాలోని భీమ్గల్ మండల కేంద్రంలో నూతనంగా ఏర్పాటు చేసిన జూనియర్ సివిల్ జడ్జి-కమ్-జ్యుడీషియల్ మేజిస్ట్రేట్ ఫస్ట్ క్లాస్ కోర్టును ఆదివారం తెలంగాణ హైకోర్టు న్యాయమూర్తి, నిజామాబాద్ జిల్లా అడ్మినిస్ట్రేటివ్ జడ్జి జస్టిస్ తంగిరాల మాధవీదేవి ప్రారంభించారు. రిబ్బన్ కత్తిరించి న్యాయస్థానాన్ని ప్రారంభించిన ఆమె, అనంతరం న్యాయవాదులు, న్యాయాధికారులతో సమావేశమయ్యారు.
ఈ సందర్భంగా జస్టిస్ మాధవీదేవి మాట్లాడుతూ, గ్రామీణ ప్రాంత ప్రజలకు సత్వర, సులభ న్యాయసేవలు అందించడంలో స్థానికంగా కోర్టుల ఏర్పాటు కీలక పాత్ర పోషిస్తుందని పేర్కొన్నారు. భీమ్గల్తో పాటు పరిసర ప్రాంతాల ప్రజలు ఇకపై కోర్టు పనుల కోసం దూర ప్రాంతాలకు వెళ్లాల్సిన అవసరం ఉండదని, దీంతో సమయంతో పాటు ఆర్థిక భారం కూడా తగ్గుతుందని తెలిపారు.
కార్యక్రమంలో తెలంగాణ హైకోర్టు న్యాయమూర్తులు జస్టిస్ లక్ష్మీనారాయణ అలిశెట్టి, జస్టిస్ గాడి ప్రవీణ్ కుమార్, నిజామాబాద్ జిల్లా ప్రధాన న్యాయమూర్తి జీవీఎన్ భరతలక్ష్మి, ఆర్మూర్ బార్ అసోసియేషన్ అధ్యక్షుడు ప్రవీణ్ చందర్, న్యాయవాదులు చైతన్య, సూర సురేష్, బార్ అసోసియేషన్ సభ్యులు, స్థానిక న్యాయవాదులు పాల్గొన్నారు.
