*నాగారంలో 100 రోజుల ప్రణాళికలో భాగంగా విజయవంతంగా ఆరోగ్య శిబిరం!*
మేడ్చల్ జిల్లా నాగారం ప్రశ్న ఆయుధం జూలై 11
తెలంగాణ రాష్ట్ర ప్రభుత్వం ప్రతిష్టాత్మకంగా చేపట్టిన 100 రోజుల ప్రణాళికలో భాగంగా, నాగారం పురపాలక సంఘం 40వ రోజు ఆరోగ్య శిబిరాన్ని విజయవంతంగా నిర్వహించింది. గోదుమకుంట వార్డు ఆఫీస్‌లో జీనియ హాస్పిటల్ (ఈ.సి.ఐ.ఎల్) ఆధ్వర్యంలో ఈ హెల్త్ క్యాంప్‌ను నిర్వహించారు.
ఈ ఆరోగ్య శిబిరంలో పురపాలక సంఘ సానిటేషన్ సిబ్బందితో సహా 100 మందికి పైగా గ్రామస్థులు చురుకుగా పాల్గొన్నారు. అనుభవజ్ఞులైన వైద్యుల పర్యవేక్షణలో కంటి పరీక్షలు, దంత పరీక్షలు, ఈసీజీ, షుగర్, బీపీ వంటి వివిధ వైద్య పరీక్షలు నిర్వహించారు. అంతేకాకుండా, అవసరమైన మందులను కూడా పంపిణీ చేసి ప్రజలకు ఎంతగానో ఉపయోగపడింది.
మరోవైపు, 100 రోజుల ప్రణాళికలో భాగంగా నాగారం పురపాలక సంఘం పరిధిలోని అన్ని వార్డుల వార్డు ఆఫీసర్లు, బిల్ కలెక్టర్లు ప్రతిరోజూ వివిధ అభివృద్ధి కార్యక్రమాల్లో పాల్గొంటూ, కొత్తగా గుర్తించిన పనులపై నివేదికలు సమర్పిస్తున్నారు. ఈ ప్రణాళిక ద్వారా వార్డు స్థాయిలో అభివృద్ధి పనులు సమర్థవంతంగా కొనసాగుతున్నాయని అధికారులు పేర్కొన్నారు.
ఈ కార్యక్రమంలో పురపాలక సంఘ కమిషనర్ ఎస్. భాస్కర్ రెడ్డి, వార్డు ఆఫీసర్ ధర్మారెడ్డి, ఎన్విరాన్‌మెంటల్ ఇంజినీర్ ఏ. బాబు, అన్ని వార్డుల వార్డు ఆఫీసర్లు, బిల్ కలెక్టర్లు, జీనియ హాస్పిటల్ సిబ్బంది పాల్గొన్నారు.
