కరీంనగర్ పోలీస్ కమిషనర్ గౌష్ ఆలం రోడ్డు ప్రమాదాల నివారణకు అవగాహన, నిబంధనల పాటించడం అత్యంత కీలకమని పునరుద్ఘాటించారు. ‘అరైవ్ - అలైవ్’ మూడవ దశ అవగాహనా కార్యక్రమంలో ఆయన ఈ వ్యాఖ్యలు చేశారు.
గత ఏడాది కమిషనరేట్ పరిధిలో రోడ్డు ప్రమాదాల్లో 200 మంది మృతి చెందడంపై సీపీ ఆందోళన వ్యక్తం చేశారు. హెల్మెట్, సీట్ బెల్ట్ వాడకపోవడం, అతివేగం, మద్యం సేవించి వాహనం నడపడం వంటివి మరణాలకు ప్రధాన కారణాలని తెలిపారు. ప్రమాదాల్లో మరణించిన వారిలో 85 శాతం పురుషులే ఉండటం ఆందోళనకరమని, ఇది కుటుంబాలపై తీవ్ర ప్రభావం చూపుతుందని ఆయన అన్నారు.
కరీంనగర్-హైదరాబాద్, వరంగల్, జగిత్యాల, సిరిసిల్ల, చొప్పదండి మార్గాల్లో ప్రమాదాలు ఎక్కువగా జరిగే 'బ్లాక్ స్పాట్లను' గుర్తించి, అక్కడ నిఘా పెంచడంతో పాటు హెచ్చరిక బోర్డులు ఏర్పాటు చేస్తున్నట్లు సీపీ తెలిపారు. హుజురాబాద్ లింగాపూర్ క్రాస్ రోడ్డు వద్ద ఇప్పటికే సైన్ బోర్డులు ఏర్పాటు చేశామని వెల్లడించారు. డ్రైవర్లు 'డిఫెన్సివ్ డ్రైవింగ్' పద్ధతిని అలవరచుకోవాలని సూచించారు.
‘అరైవ్ - అలైవ్’ కార్యక్రమంలో భాగంగా, మెడికవర్ ఆసుపత్రి వైద్యులు CPR (Cardiopulmonary Resuscitation)పై డ్రైవర్లకు ప్రత్యక్ష ప్రదర్శన ఇచ్చారు. ఇది ప్రమాద సమయంలో ప్రాణాలను కాపాడేందుకు ఉపయోగపడుతుందని తెలిపారు.
ట్రాఫిక్ ఏసీపీ మాట్లాడుతూ, హిట్ అండ్ రన్ చట్టాలపై అవగాహన కల్పించారు. ప్రమాద బాధితులకు సకాలంలో సహాయం అందించిన వారికి 'రహవీర్' పథకం కింద రూ. 25,000 ప్రోత్సాహకం అందిస్తామని తెలిపారు. ఈ కార్యక్రమంలో పలువురు అధికారులు, వైద్యులు, రాపిడో ప్రతినిధులు పాల్గొన్నారు.
