మహిళల ఆర్థిక స్వావలంబనకు వీ హబ్–డీఆర్‌డీఏ ర్యాంప్ ప్రోగ్రామ్ అవగాహన సమావేశం
మేడ్చల్ మల్కాజ్గిరి జిల్లా ప్రశ్న ఆయుధం జూలై 31
మహిళలు ఆర్థికంగా స్వశక్తితో ఎదగడానికి రాష్ట్ర ప్రభుత్వం అనేక సంక్షేమ పథకాలను అమలు చేస్తోందని, వాటిని సమర్థవంతంగా వినియోగించుకుని ఆర్థిక స్వావలంబన సాధించాలని మేడ్చల్ మల్కాజిగిరి జిల్లా అదనపు కలెక్టర్ రాధిక గుప్తా అన్నారు.గురువారం కలెక్టరేట్ సమావేశ మందిరంలో వీ హబ్ , డీఆర్‌డీఏ ఆధ్వర్యంలో మహిళా స్వయం సహాయక సంఘాల (ఎస్.హెచ్.జి) కోసం నిర్వహించిన “ర్యాంప్ ప్రోగ్రాం” అవగాహన కార్యక్రమంలో ఆమె ముఖ్య అతిథిగా పాల్గొన్నారు.
ప్రభుత్వ ప్రోత్సాహంతో అభివృద్ధికి మార్గం
ఈ సందర్భంగా ఆమె మాట్లాడుతూ, మహిళల ఆర్థిక బలపాటు కోసం కేంద్ర, రాష్ట్ర ప్రభుత్వాలు కలసి పనిచేస్తున్నాయని, ఎస్.హెచ్.జీలకు 35 శాతం వరకు సబ్సిడీతో రుణాలు అందిస్తున్నట్లు తెలిపారు. వ్యాపార నిర్వహణలో మార్కెటింగ్ లేదా రుణ సమస్యలు ఎదురైతే సంబంధిత అధికారులు సహాయం అందించేందుకు సిద్ధంగా ఉన్నారని తెలిపారు. ఎంపికైన మహిళలకు వ్యాపార నైపుణ్యాలపై శిక్షణ, ఉత్పత్తి అభివృద్ధి, మార్కెటింగ్ అంశాల్లో మార్గదర్శనం అందించనున్నట్లు పేర్కొన్నారు.ప్రోగ్రాం విశేషాలు
వీ హబ్ డైరెక్టర్ జాహిద్ షేక్ మాట్లాడుతూ, వరల్డ్ బ్యాంక్, కేంద్ర ఎం.ఎస్.ఎం.ఈ మంత్రిత్వ శాఖ ఆధ్వర్యంలో ఈ ర్యాంప్ ప్రోగ్రాం రాష్ట్రవ్యాప్తంగా చేపట్టినట్టు తెలిపారు. మహిళల ఆధ్వర్యంలో నడుస్తున్న సూక్ష్మ, చిన్న, మధ్య తరగతి సంస్థలకు (ఎం.ఎస్.ఎం.ఈ) ఆర్థిక సహాయంతో పాటు వ్యాపార అభివృద్ధికి అవసరమైన అన్ని అంశాల్లో మద్దతు అందిస్తున్నట్టు చెప్పారు.వీ హబ్ అసోసియేట్ డైరెక్టర్ ఊహ మాట్లాడుతూ… టెక్స్‌టైల్స్, ఫుడ్ ప్రాసెసింగ్, హస్తకళలు వంటి రంగాల్లోని మహిళలకు వ్యాపార శిక్షణ, బ్రాండింగ్, మార్కెట్ యాక్సెస్, రుణాల ప్రాసెసింగ్, నిపుణుల మెంటరింగ్ వంటి సేవలు ఈ ప్రోగ్రాంలో లభిస్తాయని వివరించారు.అధికారుల ఉత్సాహ భరిత పాల్గొనింపు
ఈ కార్యక్రమంలో డీఆర్‌డీఏ ప్రతినిధి సాంబశివరావు, మెప్మా పీడీ విజయలక్ష్మి, వీ హబ్ ప్రాజెక్ట్ కోఆర్డినేటర్ సాయిరామ్, జిల్లా స్వయం సహాయక సంఘాల అధ్యక్షురాలు అజయలక్ష్మి, డి.ఆర్.పి. డి.ఎస్. అమర్‌సింగ్, ఇతర అధికారులు, స్వయం సహాయక సంఘాల సభ్యులు పాల్గొన్నారు.
మహిళా పారిశ్రామికవేత్తలకు నిజమైన మార్గదర్శకంగా నిలిచే ఈ ర్యాంప్ ప్రోగ్రామ్ ద్వారా, వారు ఆర్థికంగా స్వతంత్రంగా ఎదగడానికి తోడ్పడుతుందని నిర్వాహకులు ఆశాభావం వ్యక్తం చేశారు.
