తెలంగాణ

ఐఐటీ హైదరాబాద్‌ను సందర్శించిన ఉప రాష్ట్రపతి జగదీప్ ధనకర్

by Donthi Mahesh

Published On: March 2, 2025 8:02 pm

సంగారెడ్డి ప్రతినిధి, మార్చి 2 (ప్రశ్న ఆయుధం న్యూస్): సంగారెడ్డి జిల్లా కందిలోని ఐఐటీ హైదరాబాద్‌ను భారత ఉప రాష్ట్రపతి జగదీప్ ధనకర్ ఆదివారం సందర్శించారు. విద్యార్థులతో ముఖాముఖి చర్చల్లో పాల్గొని, వారికి స్ఫూర్తిదాయకమైన సందేశాన్ని అందించారు. దేశ ఆవిష్కరణల భవిష్యత్తు, పరిశోధన, ఆర్థిక జాతీయత, సాంకేతిక నాయకత్వం తదితర అంశాలపై ఆయన విశ్లేషణాత్మకంగా మాట్లాడారు. ఉప రాష్ట్రపతిని తెలంగాణ గవర్నర్ జిష్ణు దేవ్ శర్మ, ఐఐటీ హైదరాబాద్ బోర్డ్ ఆఫ్ గవర్నర్స్ ఛైర్మన్ డాక్టర్ బీవీఆర్ మోహన్ రెడ్డి, పార్లమెంట్ సభ్యుడు రఘునందన్ రావు సాదరంగా స్వాగతించారు. సందర్శనలో భాగంగా ఉప రాష్ట్రపతి జగదీప్ ధనకర్, ఆయన సతీమణి డాక్టర్ (శ్రీమతి) సుదేశ్ ధనకర్ “ఒక చెట్టు – తల్లికి అంకితం” (Ek Ped Maa Ke Naam) కార్యక్రమంలో భాగంగా మొక్కను నాటారు.

పర్యావరణ పరిరక్షణను ప్రోత్సహించేందుకు చేపట్టిన ఈ కార్యక్రమం ప్రతి ఒక్కరూ ప్రకృతిని కాపాడేందుకు ముందుకు రావాలనే సంకేతాన్ని అందించింది. ఐఐటీ హైదరాబాద్ డైరెక్టర్ ప్రొఫెసర్ బీ.ఎస్. మూర్తి ముఖ్య అతిథులకు సాదర స్వాగతం పలికారు. అనంతరం ఛైర్మన్ డాక్టర్ బీవీఆర్ మోహన్ రెడ్డి ఐఐటీ హైదరాబాద్ సాధించిన ప్రగతిని వివరించారు.

ఈ సందర్భంగా ఉప రాష్ట్రపతి విద్యార్థులకు ఉద్దేశించి మాట్లాడుతూ.. పరిశోధన, అభివృద్ధి, ఆవిష్కరణలపై కార్పొరేట్ పెట్టుబడి కీలకమని వివరించారు. భారతదేశం గ్లోబల్ టెక్నాలజీ లీడర్‌గా ఎదగాలంటే పరిశోధన, ఆవిష్కరణలు ప్రధాన పాత్ర పోషించాల్సిన అవసరం ఉందని ఆయన తెలిపారు. భారత కంపెనీలు అంతర్జాతీయంగా పోటీ పడే స్థాయికి రావాలంటే పరిశోధన రంగాన్ని మరింత బలోపేతం చేయాల్సిన అవసరం ఉందన్నారు. యువత ఆవిష్కరణలపై దృష్టి సారించి, దేశ అభివృద్ధిలో భాగస్వాములు కావాలని పిలుపునిచ్చారు. ఐఐటీ హైదరాబాద్‌ను ఆలోచన, ఆవిష్కరణ, సాధనలో అగ్రగామిగా నిలుస్తోందని ఉప రాష్ట్రపతి ప్రశంసించారు. ఈ విద్యాసంస్థ దేశ సాంకేతిక పురోగతికి విశేషంగా తోడ్పడుతోందని, ఇక్కడి విద్యార్థులు భవిష్యత్ నాయకులుగా ఎదగాలని ఆకాంక్షించారు. భారతీయ శాస్త్ర, సాంకేతిక రంగం ప్రపంచస్థాయి గుర్తింపును పొందేలా ఇలాంటి విద్యా సంస్థలు ఎంతో సహాయ పడుతున్నాయని పేర్కొన్నారు. ఉప రాష్ట్రపతి 300 మంది ప్రతిభాశాలి అధ్యాపక బృందాన్ని ప్రత్యేకంగా ప్రశంసించారు. మౌలిక సదుపాయాలు అవసరమైనప్పటికీ, విద్యాసంస్థ విజయాన్ని నిర్ణయించేది అధ్యాపకుల అంకితభావమేనని ఆయన స్పష్టం చేశారు. విద్యార్థులకు స్ఫూర్తిగా నిలిచేలా అధ్యాపకులు వారి బోధనలో నూతన మార్గాలను అన్వేషించాలని సూచించారు. ఈ సందర్శన విద్యార్థులపై చిరస్థాయిగా ప్రభావాన్ని చూపిందని, వారి ఆలోచన విధానాన్ని మరింత విస్తృతంగా మార్చిందని ఉప రాష్ట్రపతి అభిప్రాయపడ్డారు. యువత తమ ప్రతిభను సరిగా ఉపయోగించుకుని, భారత్‌ను మరింత శక్తివంతమైన దేశంగా మార్చేందుకు కృషి చేయాలని పిలుపునిచ్చారు. ప్రస్తుతం భారత ప్రభుత్వం యువత కోసం అనేక కార్యక్రమాలను అమలు చేస్తోందని, వాటిని సమర్థంగా వినియోగించుకుని స్టార్ట్‌అప్‌లు, పరిశోధన ప్రాజెక్టులు మొదలుపెట్టాలని సూచించారు. టెక్నాలజీ అభివృద్ధిలో స్వదేశీ సంస్థలు ప్రధాన భూమిక పోషించాలని, విదేశీ కంపెనీల ఆధిపత్యాన్ని తగ్గించడానికి భారత శాస్త్రవేత్తలు, ఇంజినీర్లు తమ మేధస్సును ఉపయోగించుకోవాలని ఆయన సూచించారు. కార్యక్రమంలో విద్యార్థులు అడిగిన పలు ప్రశ్నలకు ఉప రాష్ట్రపతి సమాధానమిచ్చారు. విద్యార్థులు మార్కులకు మాత్రమే పరిమితం కాకుండా వివిధ రంగాల్లో నైపుణ్యాలను అభివృద్ధి చేసుకోవాలని సూచించారు. ఉప రాష్ట్రపతి సందేశం యువతలో కొత్త ఉత్సాహాన్ని నింపిందని, వారి భవిష్యత్తు అభివృద్ధికి మార్గదర్శకంగా నిలిచిందని పేర్కొన్నారు. ఈ కార్యక్రమంలో సంగారెడ్డి ఎమ్మెల్యే చింత ప్రభాకర్, సంగారెడ్డి జిల్లా కలెక్టర్ వల్లూరు క్రాంతి, జిల్లా ఎస్పీ సీ.హెచ్. రూపేష్, రాజ్యసభ మాజీ సభ్యుడు విజయసాయి రెడ్డి, అధ్యాపకులు, విద్యార్థులు తదితరులు పాల్గొన్నారు.

Post Views: 11

Join WhatsApp

Latest Stories

కర్రెగుట్టల్లో టెన్షన్ టెన్షన్.. ఏం జరుగబోతోంది

ఇంటర్ ఫలితాలు విడుదల.

గద్దర్ తెలంగాణ చలనచిత్ర అవార్డులు..