తెలుగు రాష్ట్రాల్లో భగ్గుమంటున్న ఎండలు: పలుచోట్ల 48 డిగ్రీలకు పైగా ఉష్ణోగ్రతలు

తెలుగు రాష్ట్రాలు తీవ్రమైన వడగాలుల ప్రభావంతో అల్లాడుతున్నాయి. రోజురోజుకు పెరుగుతున్న ఉష్ణోగ్రతలతో ప్రజలు ఉక్కిరిబిక్కిరి అవుతున్నారు. ఉదయం 8 గంటల నుంచే ఎండ తీవ్రత అధికంగా ఉంటోంది. దీంతో ప్రజలు అత్యవసరం అయితే తప్ప మధ్యాహ్నం పూట బయటికి రావడానికి జంకుతున్నారు. ఆంధ్రప్రదేశ్ మరియు తెలంగాణ రాష్ట్రాల్లో దాదాపు ఇదే పరిస్థితి నెలకొంది.

వాతావరణ శాఖ రెండు రాష్ట్రాల్లోని పలు జిల్లాలకు రెడ్ అలర్ట్ జారీ చేయగా, మిగిలిన జిల్లాలకు ఆరెంజ్ అలర్ట్ కొనసాగుతోంది. ఈ నేపథ్యంలోనే మంగళవారం పలు ప్రాంతాల్లో అత్యధిక ఉష్ణోగ్రతలు నమోదైనట్లు లెక్కలు చెబుతున్నాయి. ప్రజలు అప్రమత్తంగా ఉండాలని అధికారులు సూచిస్తున్నారు.

ఆంధ్రప్రదేశ్‌లో అత్యధికంగా పిడుగురాళ్లలో 48.1 డిగ్రీల సెల్సియస్ ఉష్ణోగ్రత నమోదైంది. తెలంగాణలోని పెద్దపల్లి జిల్లా ముత్తారంలో 46.5 డిగ్రీలు, సూర్యాపేట జిల్లా మునగాలలో 46.5 డిగ్రీల ఉష్ణోగ్రతలు నమోదైనట్లు వాతావరణ శాఖ అధికారులు వెల్లడించారు. పలు జిల్లాల్లో 47 డిగ్రీలకు పైగా ఉష్ణోగ్రతలు నమోదైనట్లు తెలిపారు.

ఆంధ్రప్రదేశ్‌లోని 18 జిల్లాల్లో మంగళవారం 45 డిగ్రీలకు పైగా ఉష్ణోగ్రతలు నమోదైనట్లు వాతావరణశాఖ అధికారులు స్పష్టం చేశారు. రాష్ట్రంలోని 20 జిల్లాల్లోని 200 మండలాల్లో 44 డిగ్రీలకు పైగా ఉష్ణోగ్రతలు నమోదయ్యాయని పేర్కొన్నారు. ఈ తీవ్రమైన ఎండల ప్రభావం మే 28వ తేదీ వరకు కొనసాగే అవకాశం ఉందని అధికారులు అంచనా వేస్తున్నారు. తెలంగాణలోనూ ఎండలు దంచి కొడుతున్నాయి. పలు జిల్లాల్లో ఉష్ణోగ్రతలు 46 డిగ్రీలు దాటాయి. ప్రజలు తగిన జాగ్రత్తలు తీసుకోవాలని అధికారులు సూచిస్తున్నారు.