Headlines in Telugu:
-
భగవంతుడిని ఏమి కోరాలి? జీవితానికి సార్థకత!
-
సుదాముడి భక్తి, శ్రీకృష్ణుడి దయతో సఫల జీవితం
-
కురుక్షేత్రంలో కృష్ణుడు – ధర్మ పాఠం
-
ఈశ్వరేచ్ఛ అనేది ఏమిటి? మన కర్మలకు ఫలితం ఎలా లభిస్తుంది?
-
మానవ పరిధిని దాటకుండ జీవించడం ఎందుకు ముఖ్యం?
*_జీవితం సఫలం కావడానికి మనం భగవంతుడిని ఏమి కోరుకోవాలి…?_*
_కంసుని ఆహ్వానంపై అక్రూరుడితో బలరాముడు, కృష్ణుడు రేపల్లె నుండి మధురకు వచ్చారు. రాజవీధిలో నడుస్తున్నారు. మాలలు కట్టే సుదాముడింటికి వచ్చారు. అతని మాలా సత్కారంతో వారు సంతోషించారు._
_అపుడు శ్రీకృష్ణుడు సుదాముడి భుజంపై చేయివేసి ‘ఏం కావాలో కోరుకో!’ అని అప్యాయంగా అడిగాడు._
అపుడు శ్రీకృష్ణుడు సాక్షాత్ భగవంతుడే అని తెలిసినా సుదాముడు ఏమడిగాడు…? మడులా, మాన్యాలా…? వనాలా, భవనాలా, వజ్రాలా, వైఢూర్యాలా…? అందాల అతివలా, అష్టైశ్వర్యాలా…? ఇవేం కోరుకోలేదు. మరేం కోరుకున్నాడు…?_
_నీ పాద కమల సేవయు నీ పాదార్చకుల తోడి నెయ్యమును, నితాం తా పార భూత దయయును తాప సమందార నాకు దయసేయగదే!_
“సదా నీ సేవాభాగ్యం ఇలాగే కల్పించు స్వామీ! అదే పదివేలు. తనకంటే తన భక్తులను ప్రేమించేవారంటే భగవంతుడికి ప్రీతి. అదుగో అటువంటి స్వామి భక్తులతోనే తాను సహవాసం చేయాలి._
అంతేనా ఎల్లవేళలా సర్వప్రాణుల పట్ల తాను దయగలిగి ప్రవర్తించాలి. తాపసులకు, సాధు జనులకు కల్పవృక్షం వంటి వాడా ఇవే నాకు అనుగ్రహించమని నిన్ను వేడుకుంటున్నాను” అని నమస్కరించాడు సుదాముడు._
_జీవితం సార్ధకం కావడానికి ఎవరైనా ఇంతకంటే కోరదగిన దేముంటుంది._
_ఒక కర్మకు ఒక ఫలితం నిర్దేశించిన వాడు ఈశ్వరుడు. ఆయన నిర్దేశించిన ఫలితం మనం చేసిన కర్మలకు వస్తున్నది. దాన్నే మనం “ఈశ్వరేచ్ఛ” అంటాం._
ఎవరు ఏ కర్మ చేస్తే వారికి దానికి తగిన ఫలితం వస్తుంది. ఆయన ఎవరి యందూ ప్రత్యేక బుద్ధి కలిగి ఉండడు. ఆయన సాక్షి. కాబట్టే ఈ కర్మలు నమోదై, ఆయా కర్తవ్య పాలనానికి ఆయా ఫలితాలు పొందుతున్నాం._
_ప్రతి మనిషికీ ప్రతీ సంఘటనకీ తన హద్దు ఒకటి తనకు ఉంటుంది. భక్తుడే కావచ్చు, జ్ఞాని కావచ్చు, యోగి కూడా కావచ్చు. తన అంతస్థును పరిథిని అతిక్రమించకూడదు._
అంతస్థు అంటే ధనం, ఐశ్వర్య సంబంధితం కాదు. ఉద్యోగం చేస్తున్నచోట మనతో కలిసి పనిచేసే వ్యక్తిని తక్కువగా చూడటం ధర్మం కాదు. (అవతల వ్యక్తి సేవకా వృత్తిలో ఉన్నప్పటికీ) ఒకరు సేవ్యుడు, ఒకరు సేవకుడు. అంతవరకే. ఆ హద్దు మీరవద్దు._
ఏ అంతస్థులో, ఏ ఉద్యోగంలో, ఏ విధి నిర్వహణలో ఉన్నా మన పరిధి దాటకూడదు. దాన్ని దాటితే ధర్మాన్నిఅతిక్రమించిన దోషం కలుగుతుంది._
_శ్రీరాముడు మానవుడుగా వచ్చాడు. మానవుడుగా జీవించాడు. యుద్ధంలో రావణుని ఎదిరించాడు, సంహరించాడు._
స్వయం ఈశ్వరుడే వచ్చి నువ్వు ఆ విష్ణువువే, ఆ “ఈశ్వర” అంశ అని చెప్పినా ఆంతర స్థితిలో ఏమున్నా లౌకిక జీవన విధానంలో తాను ఎప్పుడూ మనుష్యుడు గానే ఉన్నాడు. దైవాంశ ఉన్నదని మహిమలు చూపలేదు. మానవుడిగా తన పరిథి దాటలేదు. తన పరిథిని అతిక్రమించలేదు.
శ్రీకృష్ణుడు కురుక్షేత్ర యుద్ధంలో భీష్మునికి తన పరిథేమిటో తెలియవచ్చేలా చేసాడు. భీష్ముడు దైవీశక్తులు కలవాడు. దైవాంశ సంభూతుడు. వసువులలో ఒకడు._
కురుక్షేత్రంలో భీష్ముడు యుద్ధమత్తుడై ఒళ్ళుమరచి తన దైవీశక్తులను ప్రకటిస్తూ, పాండవ సేనను చీల్చి చెండాడుతూ, అర్జునుని మీద కూడా తన దైవీ శక్తులను ప్రకటించి యుద్ధం చేసాడు._
_భీష్ముడు మీరుతున్న మానవ పరిధిని సహించక, మానవునిగా యుద్ధం చేయక అంతస్థుని, పరిథిని మించి దైవీ శక్తులను ప్రకటిస్తున్నాడు కనుక ఆయుధం పట్టనన్న కృష్ణుడు భీష్ముని మీదకు ఉరికాడు._
_భీష్ముడు తప్పు తెలుసుకొని అస్త్రాలను వదిలి కృష్ణుని దండన స్వీకరించడానికి సిద్ధపడ్డాడు._
సంపూర్ణ అవతారమైనా ధర్మం విషయంలో మనుష్యులతో మమేకమైనప్పుడు కృష్ణుడు ఎక్కడా పరిథిని మీరలేదు._
_గీతలో “నీ కర్తవ్యం యుద్ధం చేయడం. యుద్ధం చెయ్యి, గెలిస్తే రాజ్యం , ఓడితే స్వర్గం” అన్నాడు తప్ప.. “ఏం జరిగినా నేనున్నాను, మీ అందరినీ కాపాడతా” అని చెప్పలేదు._
_నువ్వు చేయవలసింది, నీ పరిథిలో చేయమని చెప్పాడు. ’ధర్మంపాటించు’ అన్నాడంతే. కాపాడే కర్తవ్యం తన మీద పెట్టుకోలేదు._
కాల స్వరూపాన్ని గీతలో అర్జునునికి చూపాడు…”నేను మీకు ఫలితం ఇచ్చేయడం కాదు. నువ్వు యుద్ధం చేయబోతున్నావు. మీరు యుద్ధం గెలవబోతున్నారు. వారు చనిపోబోతున్నారు. మీరు రాజ్యం చేస్తారు” అని చూపించాడే తప్ప.._
“నేను మీకిచ్చేస్తున్నాను” అని చెప్పలేదు. అలా ఐతే కురుక్షేత్ర యుద్ధం లేకుండానే ఇచ్చేయవచ్చు కదా…! అలా చేయలేదు._
_అంటే… మనం చేసే కర్మలకు తగిన ఫలితమే మనకు వస్తుంది. “ఈశ్వరేచ్ఛ” అంటే కూడా అదే. ఏ కర్మకు ఏ ఫలితాన్నివ్వాలో నిర్దేశించడం తప్ప మరోటికాదు.
