*స్కూటీకి ఛార్జింగ్ అవుతుండగా పేలుడు – పక్కనే నిద్రిస్తున్న మహిళ మృతి*
ఎలక్ట్రిక్ స్కూటర్ పేలి ఓ మహిళ మృతి చెందింది. ఈ ఘటన వైఎస్సార్ కడప జిల్లాలో చోటు చేసుకుంది. ఈ ఘటనకు సంబంధించిన వివరాలు ఇలా ఉన్నాయి. కడప జిల్లా యర్రగుంట్ల మండలం పోట్లదుర్తి గ్రామంలో తెల్లవారుజామున ఇంటి ఆవరణంలో ఛార్జింగ్ పెట్టి వున్న ఎలక్ట్రిక్ స్కూటీ పేలింది. మంటల ధాటికి స్కూటర్ కాలిపోయింది. దాంతో పాటు పక్కనే ఉన్న ఇతర పరికరాలు సైతం దగ్ధమయ్యాయి.
ఆ సమయంలో పక్కనే సోఫాలో నిద్రిస్తున్న వెంకటలక్ష్మమ్మ అనే వృద్ధురాలు శరీరం మొత్తం కాలిపోయింది. విషయం తెలుసుకున్న పోలీసులు కేసు దర్యాప్తు చేస్తున్నారు. మృతదేహాన్ని పోస్టుమార్టం నిమిత్తం ప్రొద్దుటూరు ప్రభుత్వాసుపత్రికి తరలించారు. ఊహించని ఘటనతో ఆ కుటుంబసభ్యులు కన్నీరుమున్నీరవుతున్నారు.
