రామారెడ్డి మండలం పోసానిపేట్ గ్రామంలో సాయంత్రం వేళలో జరిగిన కుక్క దాడిలో ఎనిమిది మందికి గాయాలయ్యాయి. ఈ ఘటనతో గ్రామస్తులు తీవ్ర భయాందోళనకు గురయ్యారు.
సాయంత్రం సమయంలో అకస్మాత్తుగా దాడికి పాల్పడిన కుక్క, గ్రామంలోని పలువురు చిన్నారులతో పాటు పెద్దలను కూడా కరిచిందని ప్రత్యక్ష సాక్షులు తెలిపారు. బైక్పై వెళ్తున్న వారిపై కూడా కుక్క దాడి చేయడం కలకలం సృష్టించింది.
గాయపడిన వారందరినీ వెంటనే రామారెడ్డి మండల ప్రాథమిక ఆరోగ్య కేంద్రానికి తరలించి, అక్కడ వారికి వైద్యం అందించారు. ప్రాథమిక చికిత్సలో భాగంగా ఇంజెక్షన్లు ఇచ్చారు.
సంఘటన గురించి తెలుసుకున్న గ్రామ సర్పంచ్ లింగం, ఉప సర్పంచ్ అంజయ్య, మాజీ ఎంపీపీ దశరథ్ రెడ్డి, వార్డ్ సభ్యులు, గ్రామస్తులు ఆసుపత్రికి చేరుకున్నారు. బాధితులకు మెరుగైన వైద్యం అందించాలని వారు అక్కడి డాక్టర్లను కోరారు.
ఆసుపత్రి సిబ్బంది వెంటనే స్పందించి బాధితులకు అవసరమైన చికిత్స అందించడంతో, గ్రామస్తులు వారికి కృతజ్ఞతలు తెలిపారు. ఈ ఘటనపై స్థానికంగా చర్చనీయాంశమైంది.
