తెలంగాణలో 'ఏపీ విజయ' నెయ్యి కల్తీ అవుతోందంటూ వస్తున్న ఆరోపణలను ఆంధ్రప్రదేశ్ విజయ డెయిరీ యాజమాన్యం తీవ్రంగా ఖండించింది. ఈ ఆరోపణలపై తమకు తీవ్ర అభ్యంతరం ఉందని డెయిరీ అధికారులు స్పష్టం చేశారు.
రాష్ట్ర విభజన అనంతరం ఆంధ్రప్రదేశ్, తెలంగాణ రాష్ట్రాలకు వేర్వేరు విజయ డెయిరీలు ఏర్పడ్డాయని, దేశంలో ఎక్కడైనా తమ ఉత్పత్తులను విక్రయించే హక్కు తమకు ఉందని అధికారులు తెలిపారు. తెలంగాణలో ఏపీ విజయ ఉత్పత్తులను మార్కెటింగ్ చేయకుండా అడ్డుకునేందుకే ఈ విధమైన ఆరోపణలు చేస్తున్నారని వారు పేర్కొన్నారు.
ఏపీ విజయ నెయ్యి నాణ్యతపై ఇప్పటివరకు ఎలాంటి ఫిర్యాదులు అందలేదని డెయిరీ అధికారులు వెల్లడించారు. తమ ఉత్పత్తులపై నిరంతరం నాణ్యత పరీక్షలు నిర్వహిస్తున్నామని, ఇప్పటివరకు ఎలాంటి లోపాలు బయటపడలేదని వారు హామీ ఇచ్చారు.
తాజాగా, నెయ్యి నమూనాలను ప్రయోగశాలలకు పంపి పరీక్షలు నిర్వహిస్తున్నట్లు డెయిరీ అధికారులు తెలిపారు. పరీక్షల్లో కల్తీ ఉన్నట్లు తేలితే, తెలంగాణ అధికారులకు వెంటనే సమాచారం అందిస్తామని ఏపీ విజయ డెయిరీ స్పష్టం చేసింది.