కామారెడ్డి బస్టాండ్లో ఐదు రోజులుగా అనాథలా ఉంటున్న ఓ వృద్ధురాలిని గుర్తించి, ఆమెకు ఆహారం అందించి, కుటుంబ సభ్యులకు అప్పగించిన లేడీ కానిస్టేబుల్ వెంకటలక్ష్మి మానవత్వాన్ని చాటుకున్నారు.
బస్టాండ్ పరిసరాల్లో ఒంటరిగా ఉన్న వృద్ధురాలిని గమనించిన బస్టాండ్ సిబ్బంది, ఈ విషయాన్ని లేడీ కానిస్టేబుల్ వెంకటలక్ష్మికి తెలియజేశారు. సమాచారం అందిన వెంటనే అక్కడికి చేరుకున్న కానిస్టేబుల్, వృద్ధురాలి పరిస్థితిని పరిశీలించి, ఆమెకు ఆహారం అందించారు.
వృద్ధురాలి వద్ద ఉన్న ఆధార్ కార్డు ద్వారా ఆమె పేరు మొద్దింటి సాయవ్వ (76), ఆత్మకూర్ గ్రామం, నాగిరెడ్డిపేట మండలానికి చెందినవారని గుర్తించారు. వెంటనే ఆమె కుటుంబ సభ్యుల వివరాలు సేకరించి, వారికి సమాచారం అందించారు.
సమాచారం అందుకున్న సాయవ్వ ఇద్దరు కుమారులు బస్టాండ్కు చేరుకుని, తమ తల్లిని గుర్తించారు. లేడీ కానిస్టేబుల్ వెంకటలక్ష్మి సమక్షంలో సాయవ్వను ఆమె కుమారులకు అప్పగించారు. దీంతో వృద్ధురాలు సురక్షితంగా కుటుంబంతో తిరిగి కలిసింది.
ఆపదలో ఉన్న వ్యక్తికి అండగా నిలిచి, మానవత్వాన్ని చాటుకున్న లేడీ కానిస్టేబుల్ వెంకటలక్ష్మి సేవలను స్థానికులు అభినందించారు. ఆమె చర్య పలువురి ప్రశంసలు అందుకుంది.
