ఆంధ్రప్రదేశ్ రాష్ట్ర విద్యుత్ పంపిణీ సంస్థ (APSPDCL)లో నకిలీ ధ్రువపత్రాలతో ఉద్యోగాలు పొందిన 69 మందిపై సంస్థ యాజమాన్యం చర్యలు తీసుకుంది. వీరిని వెంటనే ఉద్యోగాల నుంచి తొలగించాలని ఆదేశాలు జారీ అయ్యాయి.
APSPDCLలో షిఫ్ట్ ఆపరేటర్ పోస్టుల నియామక ప్రక్రియలో అవకతవకలు వెలుగులోకి వచ్చాయి. ఐటీఐ (ఎలక్ట్రిషియన్) కోర్సు పూర్తి చేయకుండానే కొందరు అభ్యర్థులు నకిలీ సర్టిఫికెట్లను సమర్పించి ఉద్యోగాలు పొందినట్లు విచారణలో తేలింది.
ఈ వ్యవహారంపై సంస్థ సీఎండీ శివశంకర్ లోతేటి తీవ్రంగా స్పందించారు. నకిలీ సర్టిఫికెట్లతో ఉద్యోగాలు పొందిన 69 మందిని తక్షణమే తొలగించాలని సంబంధిత ఏజెన్సీలకు నోటీసులు జారీ చేశారు. ఈ చర్యల ద్వారా ఉద్యోగ నియామకాల్లో పారదర్శకతను పెంచేందుకు ప్రయత్నిస్తున్నారు.
ఉద్యోగాలు కోల్పోయిన వారిలో కడప జిల్లా నుంచి 38 మంది, కర్నూలు జిల్లా నుంచి 16 మంది, తిరుపతి నుంచి 3, చిత్తూరు నుంచి 4, నెల్లూరు నుంచి 4, అనంతపురం నుంచి 3, మరియు అన్నమయ్య జిల్లా నుంచి ఒకరు ఉన్నట్లు అధికారులు తెలిపారు. ఈ నియామకాల్లో జరిగిన మోసాన్ని బయటపెట్టడంపై అధికారులు దృష్టి సారించారు.
