నల్గొండలో పోలీసుల ఫ్లాగ్ మార్చ్: అసాంఘిక శక్తులపై ఉక్కుపాదం

బహదూర్ఖాన్ గూడ, మాన్యం చల్క, మాన్యం బావి వంటి పలు ప్రాంతాల్లో కట్టుదిట్టమైన బందోబస్తును ఏర్పాటు చేశారు. ఈ సందర్భంగా సీఐ రాజశేఖర్ రెడ్డి అసాంఘిక శక్తులను హెచ్చరించారు. చట్టాన్ని అతిక్రమించే వారిపై కఠిన చర్యలు తప్పవని స్పష్టం చేశారు. అనుమానితులపై ప్రత్యేక నిఘా ఉంచి, అక్కడికక్కడే విచారణ చేపట్టనున్నట్లు తెలిపారు.

రాత్రి వేళల్లో అసాంఘిక కార్యకలాపాలపై పోలీసులు ప్రత్యేక దృష్టి సారించారు. 'జీరో టాలరెన్స్' విధానాన్ని అవలంబిస్తూ, అటువంటి కార్యకలాపాలకు పాల్పడే వారిపై కేసులు నమోదు చేస్తామని హెచ్చరించారు. గల్లీ గల్లీని జల్లెడ పట్టిన పోలీసులు, ప్రజలకు భరోసా కల్పించారు. "మీ భద్రత మా బాధ్యత" అని వన్ టౌన్ పోలీసులు పేర్కొన్నారు.

పోకిరీలకు స్పష్టమైన సందేశం ఇచ్చిన పోలీసులు, "నల్గొండలో అల్లరి అంటే జైలు దారే" అని హెచ్చరించారు. విజిబుల్ పోలీసింగ్ ద్వారా రౌడీషీటర్లలో భయం సృష్టించి, వారిపై ప్రత్యేక నిఘా ఉంచారు. గంజాయి, డ్రగ్స్ విక్రయించినా, సేవించినా ఉపేక్షించేది లేదని, అటువంటి వారిపై జైలు శిక్షతో పాటు భారీ జరిమానా విధించబడుతుందని తెలిపారు.

ప్రజల సహకారాన్ని పోలీసులు కోరారు. అనుమానాస్పద కదలికలు కనిపిస్తే వెంటనే సమాచారం అందించాలని విజ్ఞప్తి చేశారు. మైనర్లు వాహనాలు నడిపితే వారి తల్లిదండ్రులకు కఠిన చర్యలు తప్పవని హెచ్చరించారు. మైనర్ల భవిష్యత్తును దృష్టిలో ఉంచుకొని, ఉన్నత శిఖరాలకు ఎదిగేలా వారి పిల్లలపై తల్లిదండ్రులు శ్రద్ధ వహించాలని సూచించారు. గంజాయి, డ్రగ్స్ వంటి వాటిపై పిల్లలకు అవగాహన కల్పించాలని తల్లిదండ్రులకు సూచించారు.