ఆదిలాబాద్ జిల్లా ఎస్పీ అఖిల్ మహాజన్ ఐపీఎస్, బోథ్ పోలీస్ స్టేషన్ను సందర్శించి సిబ్బందికి విధులలో నీతి నిజాయితీ, క్రమశిక్షణ, సమయపాలన పాటించాలని, అసాంఘిక కార్యకలాపాలపై నిఘా పెంచాలని సూచించారు.
జిల్లా ఎస్పీ అఖిల్ మహాజన్ ఆదివారం బోథ్ పోలీస్ స్టేషన్ను ఆకస్మికంగా సందర్శించారు. ఈ సందర్భంగా ఆయన పోలీస్ సిబ్బందితో సమావేశమై పలు కీలక సూచనలు చేశారు. విధులలో ఎల్లప్పుడూ నీతి నిజాయితీ, క్రమశిక్షణ, సమయపాలన పాటించాలని ఆయన నొక్కి చెప్పారు.
పోలీస్ స్టేషన్లో ఉన్న వాహనాల ప్రస్తుత స్థితిగతులను ఎస్పీ అడిగి తెలుసుకున్నారు. రికార్డుల నవీకరణ ఎప్పటికప్పుడు జరగాలని, విపిఓ విధానాన్ని పటిష్టంగా అమలు చేస్తూ గ్రామస్థాయిలో జరిగే ప్రతి అసాంఘిక కార్యకలాపంపై నిఘా ఉంచాలని సూచించారు. సమాచార వ్యవస్థను బలోపేతం చేసుకోవాలని తెలిపారు.
మండల పరిధిలో చట్ట వ్యతిరేక కార్యకలాపాలను పూర్తిగా అరికట్టాలని ఆదేశించారు. ముఖ్యంగా గంజాయి, గుడుంబా వంటి వాటిని నిర్మూలించాలని, ప్రభుత్వ రాయితీ బియ్యం, పశువుల అక్రమ రవాణాను అడ్డుకోవాలని స్పష్టం చేశారు. గంజాయి రహిత జిల్లాగా తీర్చిదిద్దేందుకు కృషి చేయాలని కోరారు.
రోడ్డు భద్రతపై ప్రత్యేక దృష్టి సారించి, డ్రంక్ అండ్ డ్రైవ్ తనిఖీలు ముమ్మరం చేయాలని, మండలంలో ఓపెన్ డ్రింకింగ్ జరగకుండా పర్యవేక్షించాలని సూచించారు. పెండింగ్ కేసులను సకాలంలో పూర్తి చేసి, చార్జిషీట్లు దాఖలు చేయాలని ఆదేశించారు. ఈ కార్యక్రమంలో ఆదిలాబాద్ డీఎస్పీ ఎల్ జీవన్ రెడ్డి, బోథ్ సీఐ డీ గురుస్వామి, బోథ్ ఎస్ఐ వి పురుషోత్తం, పోలీస్ సిబ్బంది పాల్గొన్నారు.
