భద్రాచలం శ్రీ సీతారామచంద్రస్వామి దేవాలయంలో శ్రీరామనవమి బ్రహ్మోత్సవాలు: కల్యాణం, పట్టాభిషేకం తేదీలు ఖరారు, టికెట్ల వివరాలు

భద్రాచలం శ్రీ సీతారామచంద్రస్వామి దేవాలయంలో ప్రతి సంవత్సరం నిర్వహించే శ్రీరామనవమి బ్రహ్మోత్సవాలకు ఈసారి విస్తృత ఏర్పాట్లు చేస్తున్నారు. మార్చి 19 నుంచి ఏప్రిల్ 2 వరకు జరిగే ఈ ఉత్సవాలలో భాగంగా, మార్చి 27న సీతారాముల కల్యాణం, మార్చి 28న పట్టాభిషేకం మహోత్సవాలు జరగనున్నాయి. ఈ ఉత్సవాలను గతంలో కంటే ఘనంగా నిర్వహించాలని దేవదాయ శాఖ ప్రణాళికలు సిద్ధం చేసింది.

ఉత్సవాలకు సంబంధించిన టికెట్లను ఆన్‌లైన్‌తో పాటు, భద్రాచలంలోని కౌంటర్ల ద్వారా కూడా విక్రయిస్తున్నట్లు దేవస్థానం ఈవో దామోదర్ రావు ఒక ప్రకటనలో తెలిపారు. దేవస్థానం అధికారిక వెబ్‌సైట్ https://bhadradritemple.telangana.gov.in ద్వారా టికెట్లను బుక్ చేసుకోవచ్చు. ఆన్‌లైన్‌లో టికెట్లు కొనుగోలు చేసిన భక్తులు మార్చి 20 నుంచి 27వ తేదీ ఉదయం 6 గంటల వరకు తానీషా కల్యాణ మండపంలోని సీఆర్‌వో కార్యాలయంలో సంప్రదించి ఒరిజినల్ టికెట్లను పొందాలని సూచించారు.

సీతారాముల కల్యాణోత్సవాన్ని వీక్షించడానికి ఆలయ పరిసరాల్లో వివిధ సెక్టార్లను ఏర్పాటు చేశారు. ఈ సెక్టార్లలోకి ప్రవేశం కోసం రూ.7,500 (ఇద్దరికి), రూ.2,500, రూ.2,000, రూ.1,000, రూ.300, రూ.150 టికెట్లు అందుబాటులో ఉన్నాయి. అలాగే, మార్చి 28న జరిగే పట్టాభిషేకం మహోత్సవం కోసం ఒక్కొక్కరికి రూ.1,500, రూ.500, రూ.100 ధరలతో టికెట్లు అందుబాటులో ఉంటాయని అధికారులు తెలిపారు. భద్రాచలం రాలేని భక్తులు తమ గోత్రనామాలతో పరోక్షంగా కల్యాణం జరిపించుకోవడానికి రూ.5,000, రూ.1,116 టికెట్లను కూడా ఆన్‌లైన్‌లో అందుబాటులో ఉంచారు.

ఈ సందర్భంగా, గతేడాది సుమారు 4 లక్షల ముత్యాల తలంబ్రాల ప్యాకెట్లను విక్రయించగా, ఈ ఏడాది ఐదు లక్షలకు తగ్గకుండా వీటిని తయారు చేయాలని అధికారులు నిర్ణయించారు. సుమారు 2 లక్షల చిన్న లడ్డూలను, 3,000కు పైగా 400 గ్రాముల మహా లడ్డూలను భక్తులకు అందుబాటులో ఉంచనున్నారు. మార్చి 27న జరిగే శ్రీరామనవమి వేడుకలకు ముఖ్యమంత్రి రేవంత్ రెడ్డి హాజరు కానున్నారు. మార్చి 28న జరిగే పట్టాభిషేకం కార్యక్రమానికి గవర్నర్ శివప్రతాప్ శుక్లాను ఆలయ అధికారులు ఆహ్వానించనున్నారు.