తిరుమలలో సీఎం చంద్రబాబు చేతుల మీదుగా ఫుడ్ ల్యాబ్ ప్రారంభం

సుమారు 12,000 చదరపు అడుగుల విస్తీర్ణంలో, రూ.19.75 కోట్ల వ్యయంతో ఈ ల్యాబ్ నిర్మాణం జరిగింది. ఇందులో ప్రసాదాలతో పాటు, ఇతర ఆహార పదార్థాల కల్తీని గుర్తించడానికి అవసరమైన అధునాతన పరికరాలు ఉన్నాయి. భక్తులకు అందించే ఆహార భద్రతను మెరుగుపరచడమే దీని లక్ష్యం.

ఈ సందర్భంగా ముఖ్యమంత్రి చంద్రబాబు మాట్లాడుతూ, భక్తుల ఆరోగ్యానికి పెద్దపీట వేయాలని, ప్రసాదాల నాణ్యత విషయంలో రాజీ పడకూడదని అధికారులకు సూచించారు. ఈ ల్యాబ్ ద్వారా తయారీ, పంపిణీ ప్రక్రియల్లో పారదర్శకత పెరుగుతుందని ఆయన అభిప్రాయపడ్డారు.

తిరుమల తిరుపతి దేవస్థానం (TTD) అధికారులు, FSSAI ప్రతినిధులు ఈ కార్యక్రమంలో పాల్గొన్నారు. ఈ నూతన ప్రయోగశాల భక్తుల ఆరోగ్య పరిరక్షణలో కీలక పాత్ర పోషిస్తుందని వారు ఆశాభావం వ్యక్తం చేశారు.