తిరుమల తిరుపతి దేవస్థానం (టీటీడీ) అధికారులు ఒంటిమిట్ట కోదండ రామాలయానికి చెందిన ముగ్గురు అర్చకులకు షోకాజ్ నోటీసులు జారీ చేశారు. ఉన్నతాధికారుల అనుమతి లేకుండా పులివెందులకు వెళ్లి మాజీ ముఖ్యమంత్రి వై.ఎస్. జగన్మోహన్ రెడ్డికి ప్రత్యేక పూజలు నిర్వహించి, ఆలయానికి చెందిన వస్తువులను అందజేయడంపై ఈ నోటీసులు జారీ అయ్యాయి.
టీటీడీ ఉన్నతాధికారుల నుంచి ముందస్తు అనుమతి తీసుకోకుండా, ఒంటిమిట్ట కోదండ రామాలయ అర్చకులైన ఎ.శ్రావణ్కుమార్, వీణా మనోజ్కుమార్, కె.పార్థసారథిలు పులివెందులకు వెళ్లి, మాజీ సీఎం వై.ఎస్. జగన్మోహన్ రెడ్డికి వేద ఆశీర్వచనాలతో పాటు, శేష వస్త్రం, రాములోరి తోమాల, ముత్యాల తలంబ్రాలు అందజేశారు. ఈ సంఘటనపై టీటీడీ ఉప కార్యనిర్వహణాధికారి ఎ.ప్రశాంతి షోకాజ్ నోటీసులు జారీ చేశారు. ఈ నోటీసులకు రెండు రోజుల్లోగా సమాధానం ఇవ్వాలని స్పష్టం చేశారు.
అనధికారికంగా ఆలయానికి చెందిన వస్తువులను, అర్చకులను ఉపయోగించుకోవడం టీటీడీ నిబంధనలకు విరుద్ధమని అధికారులు తెలిపారు. ఈ చర్య ఆలయ ప్రతిష్టకు భంగం కలిగించేలా ఉందని, భవిష్యత్తులో ఇలాంటివి పునరావృతం కాకుండా కఠిన చర్యలు తీసుకోవాలని సూచనలు వస్తున్నాయి. అర్చకుల నుంచి వచ్చే వివరణ ఆధారంగా తదుపరి చర్యలు ఉంటాయని టీటీడీ వర్గాలు పేర్కొన్నాయి.
ఈ సంఘటనపై ఆలయ వర్గాల్లోనూ, భక్తుల్లోనూ చర్చ జరుగుతోంది. టీటీడీ నిబంధనలను అర్చకులు పాటించకపోవడంపై పలువురు విమర్శలు వ్యక్తం చేస్తున్నారు. దీనిపై టీటీడీ ఉన్నతాధికారులు స్పందించి, తగిన చర్యలు తీసుకోవాలని కోరుతున్నారు.
