బిబిపేట మండలంలోని జిల్లా పరిషత్ ఉన్నత పాఠశాలలో విద్యార్థులకు మైనర్లపై జరిగే నేరాలు, సైబర్ నేరాలు, వేసవి జాగ్రత్తలు వంటి అంశాలపై పోలీసులు అవగాహన కల్పించారు.
కామారెడ్డి జిల్లా ఎస్పీ ఆదేశాల మేరకు, స్థానిక సబ్-ఇన్స్పెక్టర్ సూచనల మేరకు పోలీస్ కళాబృందం ఈ కార్యక్రమాన్ని నిర్వహించింది. షి టీమ్, సైబర్ క్రైమ్ టోల్ ఫ్రీ నంబర్లు, అత్యవసర డయల్ 100 గురించి వివరించారు. సోషల్ మీడియా వాడకంలో జాగ్రత్తలు తీసుకోవాలని, చదువుపై దృష్టి పెట్టాలని సూచించారు.
తల్లిదండ్రుల మాట వినాలని, చిన్న పొరపాట్లు జీవితాలను నాశనం చేస్తాయని పోలీసులు హెచ్చరించారు. పోలీస్ కళాబృందం సభ్యులు పాటలు, మాటల ద్వారా అవగాహన కల్పించారు.
ఈ కార్యక్రమంలో పాఠశాల హెడ్ మాస్టర్, ASI, షి టీమ్ సభ్యురాలు, ఉపాధ్యాయులు, విద్యార్థులు పాల్గొన్నారు.
