సంగారెడ్డి జిల్లా, అమీన్పూర్ మండలం, ఐలాపూర్లో ప్రభుత్వ భూముల ఆక్రమణలపై హైకోర్టు ఎలాంటి స్టే విధించలేదని కమిషనర్ రంగనాథ్ స్పష్టం చేశారు. శనివారం జరిగిన హైడ్రా కూల్చివేతలపై వస్తున్న పుకార్లను ఆయన ఖండించారు.
ముఖీమ్ అనే వ్యక్తి ప్రభుత్వ భూములను ఆక్రమించి, 2006లో నిర్మించిన ఫాంహౌస్ను కేంద్రంగా చేసుకుని సుమారు 40 ఎకరాల ప్రభుత్వ భూమిని కబ్జా చేశారని రంగనాథ్ వివరించారు. ఈ ఆక్రమణలపై చర్యలు తీసుకున్నట్లు ఆయన తెలిపారు.
కోర్టు ఆదేశాలను ఉల్లంఘించి జరిగిన నిర్మాణాలను మాత్రమే తొలగించామని, సామాజిక మాధ్యమాల్లో హైడ్రాపై తప్పుడు ప్రచారం జరుగుతోందని కమిషనర్ పేర్కొన్నారు. అక్రమ నిర్మాణాల కూల్చివేత విషయంలో న్యాయస్థానం ఆదేశాలను పాటించామని ఆయన స్పష్టం చేశారు.
అక్రమంగా నిర్మించిన ఆరు అంతస్తుల భవనాన్ని భారీ పోలీసు బందోబస్తు మధ్య కూల్చివేసినట్లు రంగనాథ్ తెలిపారు. ప్రభుత్వ భూములను కాపాడటమే తమ లక్ష్యమని ఆయన అన్నారు.
